Eı Djeımen judyryqtasýy múmkin

Áýesqoı boksshylar arasynda Qazaqstannyń úsh dúr­kin chempıony atanyp, Dúnıe­júzilik ýnıversıadada kú­mis medaldi moınyna ilgen Jan Kosobýskıı kásipqoı rıngte ózin jaqsy qy­rynan kórsetip júr. 2017 jyldan beri ol 19 ret sharshy alań­ǵa kóterilip, barlyq jekpe-jekte jeńiske jetti. Sol básekelerdiń bireýi ǵa­na sońǵy raýndqa deıin sozyl­dy. Ol – 2018 jyldyń qyr­kúıeginde ýkraınalyq Kon­stantın Dovbyshenkomen ótken kezdesý edi. 34 jas­taǵy Arqalyqtyń týmasy ózge básekelerdiń barly­ǵynda qarsylastaryn no­kaýtqa jiberdi.

Jannyń qarsylasy da óte myqty. 29 jastaǵy Efe Adjagaba Nıgerııada týyp-óskenimen, biraz jyldan beri AQSh-ta turyp jatyr. Ol – Afrıka oıyndarynyń jeńimpazy jáne Dostastyq oıyndarynyń qola júl­degeri. 2016 jyly Rıo-de-Janeıroda alaýy tutanǵan Olımpıadaǵa qatysyp, shırek fınalda bizdiń Ivan Dychkoǵa ese jiberdi. Efe de kásipqoı bokstaǵy mansabyn osydan alty jyl buryn bastady. Sol aralyqta 18 kezdesý ótkizip, 17 ret jeńiske jetti. 13 básekeni merziminen buryn aıaqtady. Ol 2021 jyldyń qazan aıyn­da áli de jeńilistiń kermek dámin tatpaǵan Kýba boks­shysy Frenk Sanches Foreden ǵana jeńildi.

Bir aıta keterligi, Ad­ja­gaba barlyq jekpe-je­gin AQSh-ta ótkizse, Koso­býskıı Amerıkada alǵash ret óner kórsetpek. Buǵan deıin otandasymyz Belarýs, Reseı, Germanııa jáne BAÁ-de judyryqtasty. Eń bastysy, osy básekede jeńiske jetken boksshy jyl sońynda ulybrıtanııalyq Entonı Djoshýamen kúsh synasýy múmkin. Al ol sańlaq jaıynda ne bilemiz?

Entonıdiń jasy – 33-te. Ýotford qalasynyń týmasy 2011 jyly áýesqoılar arasynda álem chempıonatynyń kúmis júldegeri atandy. Bakýde ótken jarystyń fınalynda ol jergilikti bylǵary qolǵap sheberi Magomedrasýl Medjıdovtan bir ǵana upaı aıyrmashylyǵymen jeńildi. 2012 jyly London Olımpıadasynda bas júldeni oljalady. Tumandy Albıon elinde alaýy tutanǵan dúbirli dodanyń jartylaı fınalynda Djoshýa qazaqstandyq Ivan Dychkony jeńse, fınalda ıtalııalyq Roberto Kammarelleni qapy qaldyrdy.

2013 jyldyń kúzinde Entonı Djoshýa kásipqoı rıngtegi tusaýkeser kezdesýin ótkizip, Italııanyń ókili Emanýele Leony birinshi raýndta-aq uryp jyqty. Barlyǵy 29 kezdesýdiń 26-syn Eı Djeı (Djoshýanyń janama esimi – red.) óz paıdasyna sheshti. Kezinde ol – Denıs Bahtov, Kevın Djonson, Dıllıan Ýaıt, Charlz Martın, Domınık Brızıl, Vladımır Klıchko, Djozef Parker, Aleksandr Povetkın, Kýbrat Pýlev jáne taǵy basqa sańlaqtardy sabaǵan.

Ulybrıtanııanyń alyby alǵash ret 2019 jyldyń 1 maýsymynda oıda-joqta AQSh-ta turyp jatqan tegi meksıkalyq Endı Rýısten nokaýtpen jeńilip, álem chempıony ataǵynan aıyryldy. Arada alty aı ótken soń Rýısty upaı sanymen utyp, ketken esesin qaıtardy. Odan keıin Djoshýa qatarynan eki ret ýkraınalyq Aleksandr Ýsıkke jol berdi. Bıyl Eı Djeı eki ret rıngke kóterilip, 1 sáýirde amerıkalyq Djermeın Franklındi upaı sanymen jeńse, 12 tamyzda fınlıandııalyq Robert Helenıýsti jetinshi raýndta esinen tandyrdy.