«Jyr jaýhary» dep atalǵan poetıkalyq dýelge óńirdiń ár qıyrynan kelgen 16 jas aqyn qatysty. Jerebe arqyly anyqtalǵan segiz juptan ekinshi kezeńge segiz aqyn iriktelip shyqty. Olardyń ishinde jańa esimder de joq emes.
Qaırat Rysqulbekov atyndaǵy saıabaqtyń saıasynda ornalasqan «Ǵıbrat» meıramhanasynda ótken is-sharada jas aqyndar erkin kósildi. Tipti keıbiriniń óleńderinen bolashaq sýretker aqynǵa tán qoltańba da ańǵarylyp turdy.
Topqa túsken on altynyń ishinde osaly joq. Sodan da bolsa kerek, is-sharany uıymdastyrǵan jastar saıasaty máseleleri basqarmasy «báıge berem jyǵylǵan balýanǵa da, adaldyǵy kórinip turar bolsa» dep jyrlaǵan Tólegen Aıbergenovtiń óleńin negizge alyp, jeńilgen aqyndardy da quralaqan qaıtarǵan joq.
Poetıkalyq dýel qorytyndysynda
«O,qońyr kúz, ózińe syr aqtardym,
Únsizdikti jalǵanda unatqan kim?
Saǵan óleń oqyp em tyńdamadyń,
Aspanǵa óleń oqyp em, jylap qaldy»,
dep jyrlaǵan qulandyq Álimjan Shóńgerbaı jeńimpaz atansa, tarazdyq Ǵaınıken Maraltaıqyzy ekinshi, Jumataı Kóksýbaı men Symbat Sultan úshinshi orynǵa laıyq dep tanyldy. Taǵy birneshe aqyn arnaıy atalym ıegeri atandy. Júldeger atanǵan aqyndardyń barlyǵyna qomaqty qarjylaı syılyq tabystaldy.
Jambyl oblysy
