MAEK-tegi №3 energııa blogyn qalpyna keltirýge baılanysty, sondaı-aq №1 JES energııa blogy jumysynyń ýaqytsha toqtaýy sebepti júrgizilip jatqan jumystar Mańǵystaý oblysynda elektr energııasyn tutynýǵa ýaqytsha «tıimdi» shekteý rejimin engizýge májbúr etti. «KEGOK» AQ Ulttyq dıspetcherlik ortalyǵy dıspetcheriniń kelisimimen engizilgen sharaǵa saı óńirdiń birqatar eldi mekeninde elektr energııasyn ajyratý ádisi qoldanylady.
13 tamyzda MAEK-tegi energobloktardyń apattyq jóndeýde bolýyna baılanysty oblysta aımaq basshylyǵynyń tóraǵalyǵymen quramyna ýákiletti memlekettik organdar men kommýnaldyq qyzmet ókilderi kirgen jedel shtab quryldy. Jedel shtab 13-14 tamyzǵa qaraǵan túni birinshi sanattaǵy nysandardy, ıaǵnı áleýmettik jáne densaýlyq saqtaý nysandaryn elektr energııasymen qamtamasyz etý máselesin qarady. Sondaı-aq óńirdiń eldi mekenderin elektr energııasymen proporsıonaldy qamtamasyz etý úshin ýaqytsha ajyratýdy «tıimdi» tásilmen qoldaný týraly sheshim qabyldandy. Atalǵan sheshimge sáıkes, tutynylatyn energııa kólemin shekteý maqsatynda tutynýshylardy 3-ten 5 saǵatqa deıingi elektr jelisinen sıkldik ajyratý júrgiziledi jáne bul shekteý «MAEK» energobloktaryndaǵy apat joıylǵanǵa deıin jalǵasady.
Iri ónerkásiptik nysandarǵa beriletin elektr energııasyna da shekteý qoıylmaq. Jedel shtab elektr energııany tez arada qalpyna keltirý maqsatynda birqatar shara qabyldap jatyr. Mańǵystaý oblysy ákiminiń birinshi orynbasary Jumabaı Qaraǵaev jaýapty tulǵalarǵa barlyq kommýnaldyq qyzmettiń úılesimdi jumysyn uıymdastyrýdy, sondaı-aq «MAEK»energobloktaryndaǵy apat joıylǵanǵa deıin ónerkásip tutynýshylary men turǵyndarǵa elektr energııasyn únemdi paıdalaný týraly túsindirý jumystaryn júrgizýdi tapsyrdy.
Tamyz aıynyń 14-inen, ıaǵnı aptanyń basynan bastap sońyna deıin Aqtaý jáne Jańaózen qalalarynda, birqatar eldi mekende elektr energııasyn tutynýdyń shekteý rejimine sáıkes saralanǵan keste jasaqtaldy. 15-18 tamyz aralyǵyn qamtıtyn kestede Jańaózen qalasynda, Munaıly aýdany men Túpqaraǵan aýdanynda, Mańǵystaý aýdany men Aqtaý qalasy shaǵyn aýdardarynda elektr energııasyn ajyratýdyń kestesi kórsetilgen.
MAEK-te jaǵdaı máz emes. Turǵyndar qylyshyn súıretip qyr astynda turǵan qysta jaryq pen jylý, sýmen qamtýdyń qalaı bolaryna alańdaýly.
Mańǵystaý oblysy
