«Talas Investment Company» JShS dese, altyn óndirý ónerkásibi, sondaı-aq basqa da birshama óndiriste paıdalanylatyn, ımporttyq taýar sanalatyn hımııa ónerkásibiniń óńirdegi alǵashqy kásiporny oıǵa oralatyny ras. Seriktestik ashylǵaly óńir ekonomıkasyna aıtarlyqtaı tabys túsirip otyr. 2014 jyly iske qosylǵan zaýyttyń jumysy áýelden-aq jolǵa qoıylǵany málim. Qanatyn keńge jaıǵan kásiporyn búginde úzilissiz, qalypty rejimde jumys istep tur. Derekterge sensek, alǵashqy jartyjyldyqta zaýyt qyzmetkerleriniń eseli eńbeginiń arqasynda 5 688 tonna natrıı sıanıdi jáne 2 375 tonna ammonıı sýlfaty óndirilipti. Jaýapty mamandar ónim kólemin jyl sońyna deıin eselep arttyrýǵa nıettenip otyr.
Zaýyt basshylarynyń aıtýynsha, kásiporynnyń jyldyq qýaty 15 myń tonna natrıı sıanıdin óndirýge qaýqarly eken. Qazirgi tańda óndiris oshaǵynda 557 azamat turaqty jumyspen qamtylǵan. Aldaǵy ýaqytta qyzmetkerlerdiń sany taǵy da arta túspek. О́ıtkeni munda qolǵa alynatyn jumys aýqymy ulǵaımaq.
«О́ńir ekonomıkasynyń órkendeýi men jergilikti jerdegi halyqtyń ál-aýqatynyń kóterilýi óndiris oryndary sanynyń artýymen tikeleı baılanysty. Jańa zaýyt ashylsa, jumyssyz júrgen azamattar úshin eki qolǵa bir kúrek tabylady. Sol turǵydan alyp qaraǵanda «Talas Investment Company» JShS zaýytynyń ekinshi kezeńi iri joba ekenine eshkimniń talasy joq. Qazirgi kezde oblysqa iri ınvestısııalar tartýǵa basa nazar aýdaryp otyrmyz. О́ńir basshysy Nurjan Nurjigitovtiń yqpalymen bıyl Jambyl óńirine 572 mlrd teńgeden asa ınvestısııa tartylady degen josparymyz bar», deıdi oblys ákiminiń orynbasary Qanatbek Mádibek.
Iri zaýyttyń ekinshi kezeńiniń ýaqyt kapsýlasyn salý saltanatty rásimine qatysqan mártebeli meımandar alyp joba júzege asqan kezde óndiris qýaty eki esege deıin artatynyn rastap otyr. Tıisinshe jańa jumys oryndary ashylady dep kútiledi. Bul – árıne, jergilikti halyq úshin jaǵymdy jańalyq. Qysqasy, Talas aýdanynda taǵy bir iri óndiris oshaǵynyń qurylysy bastaldy.
«Zaýyt óndiretin ónimge degen suranys jyl ótken saıyn arta túskenin ańǵaryp otyrmyz. Sol sebepti iri kásiporynnyń ekinshi kezeńiniń qurylysy bastaldy. Jalpy, buǵan deıin seriktestik jylyna 15 myń tonna natrıı sıanıdin óndirýge qaýqarly bolsa, ekinshi kezeńniń qurylysy aıaqtalǵannan keıin jumys aýqymy eki esege artady. Naqtyraq aıtar bolsaq, óndiriletin ónim 30 myń tonnaǵa jetedi», deıdi Talas aýdandyq kásipkerlik jáne ónerkásip bóliminiń basshysy Aýdanbek Taýasarov.
Ýaqytynda údemeli ındýstrııalyq-ınnovasııalyq damý baǵdarlamasy aıasynda boı kótergen zaýytta áýelde 400-den asa adam eńbek etse, qazirgi tańda jumysshylardyń sany 557 adamǵa jetip otyr. Osy kórsetkishke qarap-aq iri óndiris oshaǵynyń jumysy júıelengenin baıqaý qıyn emes.
Elimizdiń hımııa ónerkásibinde natrıı sıanıdin óndiretin tuńǵysh zaýyt retinde tirkelgen «Talas Investment Company» JShS-nyń óndiris ornyn qytaılyq mamandar qurastyrǵan edi. Derekterge sensek, óndiris oshaǵy qaldyqsyz tehnologııaǵa negizdelgen. Mamandardyń aıtýynsha, kásiporynǵa qajetti shıkizat retinde gaz ben ken qospalary paıdalanylady. Nátıjesinde, túıirshiktelgen qurǵaq natrıı sıanıdi shyǵarylady. Joǵary temperatýrada ajyratylǵan ammonıı sýlfatyn tyńaıtqysh retinde paıdalanýǵa bolady eken. О́ndiris oshaǵynyń óńir ekologııasyna eshqandaı zııany joq.
Kásiporyn basshylary óndirilgen ónimdi eksportqa shyǵarýdy jolǵa qoıǵan. Qazirgi tańda zaýyt óniminiń 30-40
paıyzy Reseı Federasııasyna sondaı-aq Mońǵolııa, Qyrǵyz Respýblıkasy jáne Tájikstan elderine jóneltilip jatyr.
Zaýyttyń ekinshi kezeńiniń qurylys jumysyn júzege asyrý úshin qajetti ınvestısııa 25,8 mlrd teńgeni quraǵan. Kásiporyn jumysyn bastaǵan kezde qosymsha 300 azamat jumyspen qamtylmaq. Jaýapty azamattar jumysshylardy tańdaý kezinde jergilikti turǵyndarǵa basymdyq beriletinin alǵa tartyp otyr. Kásiporynnyń ekinshi kezeńi 2025 jyly aıaqtalyp, paıdalanýǵa beriledi degen jospar bar.
Jambyl oblysy,
Talas aýdany
