Memleket basshysy qonaqjaılyq kórsetkeni úshin Vo Van Thyongqa alǵys aıtyp, osy saparǵa basa mán beretinin atap ótti.
– Qazaqstan Prezıdenti retinde Sizdiń elińizge alǵash ret saparmen kelip otyrmyn. Men bul saparyma basa mán beremin. Qazaqstanda Sizdiń elge jáne Vetnam halqyna zor qurmetpen qaraıtynyn atap ótkim keledi. Vetnamnyń ekonomıkalyq jetistikteri elderimizdiń yntymaqtastyǵyn odan ári nyǵaıtýǵa berik negiz bolady. Biz eki memleket arasyndaǵy ekonomıkalyq, saıası qatynastarǵa basa mán beremiz jáne Vetnamnyń ekonomıkalyq zor áleýetin jáne onyń halyqaralyq arenadaǵy bedelin joǵary baǵalaımyz, – dedi Qasym-Jomart Toqaev.
Prezıdent ótken jyldyń qorytyndysy boıynsha ózara saýda-sattyq jarty mıllıard dollardan asqanyna, bıylǵy alty aıdyń ózinde 600 mıllıon dollar bolǵanyna nazar aýdardy. Jyl sońyna deıin bul mańyzdy kórsetkishti 1 mıllıard dollarǵa deıin jetkizý josparlanyp otyr.
Memleket basshysy búgingi kelissózder ekijaqty qatynastardy damytýdyń jańa kezeńine jol ashatynyna senim bildirdi.
