Jarystyń alǵashqy kúni 66 kg salmaq dárejesinde kúsh synasqan Aıbolat Ystybaı qola medal oljalady. Bastapqy básekelerde ýkraınalyq Nıkıta Golborodko men latvııalyq Entonı de Anjelıstiń osal tusyn esh qınalmaı tapqan ol úshinshi kezeńde Izraıldiń tanymal balýany, álem jáne Eýropa chempıonattarynyń júldegeri Tal Flıkermen ábden tiresti. Negizgi ýaqyt teń aıaqtalyp, «golden skorda» qandasymyzdyń mereıi ústem boldy. Shırek fınalda Grand Slem men Gran-prı jarystarynyń jeńimpazy ıspanııalyq Davıd Garsııa Tornǵa jol bergen Aıbolat jubanysh beldesýinde álem jáne qurlyq birinshilikteriniń qola júldegeri, ázerbaıjandyq Karamat Gýseınovti ıpponmen jeńip, úshinshi oryn úshin tartysta Kıprdiń týy astynda óner kórsetip júrgen grýzııalyq Georgıos Balardjıshvılıden basym tústi. Kezinde jasóspirimder arasynda álem chempıony atanǵan Aıbolat Ystybaı úshin bul – eresekterdiń halyqaralyq dodasyndaǵy alǵashqy júldesi.
О́zge jerlesterimiz jaıynda aıtar bolsaq, dál sol salmaqta kúresken Eset Qýanov tusaýkeser kezdesýinde ýkraınalyq Bagdan Iаdovqa jol berdi. 60 kg salmaqtaǵy jigitterimizdiń de joly bolmady. Damır Bolatbekov alǵashqy aınalymda shveısarııalyq Semıýel Vaızeneggerden utylsa, Mereı Marhambetov nıderlandtyq Emıel Djarıngten jeńildi.
Jarystyń ekinshi kúni 73 kg salmaqta synǵa túsken Baqytjan Ábdýrahmanov qola medal ıelendi. Ol majarstandyq Danıel Segedı, fransııalyq Orlando Kasorla, túrkııalyq Bılal Chıloǵly jáne kosovolyq Akıl Gıakovany jeńgenimen, ıspanııalyq Horhe Garsııa Kanoǵa áli jetpedi. Bul da Baqytjannyń dúbirli dodalardaǵy alǵashqy júldesi. Al Darhan Qoıbaǵar (73 kg) men Aıbar Muqyshev (81 kg) alǵashqy aınalymdarda súrindi.
Áıelder arasynda jalǵyz Ábıba Ábýjaqynova jarys kórigin qyzdyrdy. 48 kg salmaqta beldesken ol fransııalyq Aımard Vırdjınııany jeńgenimen, ıspanııalyq Mıreııa Lapýertaǵa ese jiberdi. Jubanysh beldesýinde amerıkalyq Marııa Selııa Labordeniń aıaǵyn kókten keltirgenimen, qola medal úshin básekede Ispanııanyń taǵy bir ókili Laýra Martınes Abelendadan aılasyn asyra almady.
