Foto: OKQ baspasóz qyzmeti
Qazirgi geosaıası ahýal men kóshi-qon saıasaty tujyrymdamasy aıasyndaǵy sharalar nátıjesinde sońǵy 11 jylda alǵash ret kóshi-qon salasynda oń úrdis baıqalyp otyr. Elimizge negizinen TMD, Qytaı, Mońǵolııa jáne taǵy basqa memleketterdiń azamattary turaqty turýǵa keledi. Kóship kelgenderdiń arasynda bıyldan bastap eńbekke qabiletti azamattardyń sany arta bastaǵan, olardyń sany 7 myń 59 adamdy qurap otyr.
«Mysaly, turaqty turýǵa kelgen 2500 adamnyń bilimi joǵary, al 1655 adamnyń orta kásiptik bilimi bar, 2884 adamnyń bilimi orta», dep naqtylady kóshi-qon salasynyń basshysy.
Sonymen qatar tehnıkalyq, ekonomıkalyq, medısınalyq, pedagogıkalyq bilimi bar shetel azamattary Qazaqstanǵa kóptep kelip jatyr.
«Ishki kóshi-qon turaqtaldy. Jyl basynan beri 160 myńnan astam adam el ishinde qonys aýdardy. Bul kórsetkish byltyrǵymen salystyrǵanda 11%-ǵa tómen», dedi A. Ertaev.
Bul rette spıkerdiń aıtýynsha, eldegi iri qalalarǵa kósh tizginin burǵan azamattar kóp, olardyń úles salmaǵy - 40%. Eń iri úsh qala – Astana, Almaty, Shymkent qalalaryna negizinen oblys ortalyqtarynan, monoqalalardan jáne aýyldardan kóship kelýshiler kóp.
Budan basqa, komıtet tóraǵasy kóshi-qon saıasaty tujyrymdamasy aıasynda iske asyrylyp jatqan jumystarǵa toqtaldy.
Birinshi baǵyt – bilim mıgrasııasy. Bıyl Qazaqstannyń JOO-lary bazasynda sheteldik JOO-lardyń 6 fılıaly quryldy. Qabyldanǵan sharalar nátıjesinde bıyl sheteldik stýdentterdiń úlesi barlyq stýdentterdiń 4,1%-ynan 4,4%-yna deıin artqan.
Ekinshi baǵyt – bıznes ımmıgrasııasy aıasynda elimizdiń ınvestısııalyq tartymdylyǵyn arttyrý. A5 sanatyndaǵy ınvestorlar shetelden jumys kúshin tartý úshin ruqsat almaıtyn boldy. Jyl basynan beri 76 shetel azamatyna osyndaı ınvestor vızasy berilgen. Investor bıznesmenderdiń ınvestısııalyq vıza alýyna qajetti tómengi shekti $300 myńǵa deıin azaıtylady. Sonymen qatar, A6 uzaq merzimdi jańa ınvestorlyq vıza túri engiziledi. Mundaı vıza ıelerine elimizdiń aýmaǵyna turaqty turý úshin yqtııarhat alý quqyǵy beriledi.
«Shetelde tabysty bıznesteri bar etnostyq qazaqtar úshin «Ata joly» kartasyn berý tártibi bekitildi. Ata joly kartasynyń basty ereksheligi – sheteldik baýyrlarymyz ózge memlekettiń azamaty bolǵanymen, óz azamattarymyzben birdeı quqyqtarǵa ıe bolady», dedi A. Ertaev.
