Joba 6 qyrkúıekte saǵat 14.00-de Qarajar (Ilınka) aýylynda bastaý alady. Is-shara qarsańynda, dálirek aıtqanda 5 qyrkúıekte elordadaǵy «Qazanat» ıppodromynda 18.00-de respýblıkalyq ulttyq sport túrleriniń festıvali aıasynda Joryqtyń saltanatty tusaýkeseri ótedi.
Uzyndyǵy 1300 shaqyrym bolatyn marshrýt Aqmola, Qaraǵandy, Ulytaý, Qyzylorda jáne Túrkistan oblystaryn basyp ótip, 19 qyrkúıekte Túrkistan qalasynda óz máresine jetedi.
«Uly dala joryǵy» marafon-báıgesindegi 1300 shaqyrym qashyqtyqty baǵyndyratyndar qatarynda qyzdardan jasaqtalǵan «Imanjúsip» komandasy - Aqmola oblysynyń quramasy úlken dodaǵa daıyndyqty bastap ketti.
Merzaq Sadýaqasov syndy er azamatpen qatar Lázzat, Laýra, Anna, Evgenııa esimdi 4 arý Aqmola oblysy komandasynyń namysyn qorǵamaq. 
Jobanyń júlde qory - 65 mln teńge. Jeńimpaz komanda 30 mln teńge, ekinshi oryn ıegerleri - 20 mln teńge, qola júldegerler - 15 mln teńge alady.
Aıta ketsek, marafon jumysyna 2 halyqaralyq, 2 qazaqstandyq sýdıa jáne 2 halyqaralyq, 3 qazaqstandyq veterınar shaqyryldy.
«Uly dala joryǵy» jobasyn respýblıkalyq «JORYQ» at sporty federasııasy Qazaqstan Respýblıkasy Mádenıet jáne sport mınıstrliginiń, «Amanat» partııasynyń, QR Ulttyq sport túrleri qaýymdastyǵynyń qoldaýymen júzege asyrady.
