Foto: Astana ákimdigi
Astana qalasy ákimdiginiń málimetinshe, alǵashqy «Besik álemi» blogy úsh jasqa deıingi búldirshinderge arnalǵan. 1 maýsym kúni Jastar saıabaǵynda dástúrli «Arba FEST» arbalar sherýi ótedi. Prezıdent saıabaǵynda eńbekteıtin sábıler arasynda «Shapshań bóbek» jarysy uıymdastyrylady. Sonymen qatar qala saıabaqtarynda otbasylyq fotoaımaqtar men damytýshy oıyn alańdary ashylady.
3-6 jas aralyǵyndaǵy balalarǵa arnalǵan «Balapan álemi» blogy aıasynda búldirshinderge sýdaǵy, kóshedegi jáne ınternettegi qaýipsizdik erejeleri oıyn formatynda túsindiriledi.
1 maýsym kúni elordada III Halyqaralyq kloýndar festıvali ótedi. Saǵat 12:00-de festıval qatysýshylary «Báıterek» monýmentinen Ǵashyqtar saıabaǵyna deıin sherý jasaıdy. Al keshki saǵat 17:00-de Amfıteatrda merekelik konsert uıymdastyrylady.
Sol kúni saǵat 10:00-18:00 aralyǵynda qalalyq emhanalarda balalarǵa arnalǵan stomatologııalyq ashyq esik kúni ótedi.
7-10 jas aralyǵyndaǵy balalarǵa arnalǵan «Bilim men arman álemi» blogy sheńberinde túrli shyǵarmashylyq jáne sporttyq sharalar josparlanǵan. 30 mamyr kúni Jeruıyq-2 saıabaǵynda erekshe balalarǵa arnalǵan «Baqytty bala» merekesi ótedi.
1 maýsym kúni Kirpishti jáne О́ndiris alaptarynda «Kóńildi starttar» saıystary uıymdastyrylady. «Han Shatyr» ortalyǵynda balalar sán kórsetilimi ótse, №64 mektep-lıseıinde «Álem balalar kózimen» shyǵarmashylyq baıqaýy uıymdastyrylady.
Tehnıkalyq jáne kórkem shyǵarmashylyq ortalyǵynda balalar jumystarynyń kórmesi men sheberlik sabaqtary ótedi. Qalalyq alańda konserttik baǵdarlama usynylady.
Sándi keshtiń ornyna ıgi is: Almatylyq túlekter balalar úıi men kópbalaly otbasyǵa teledıdar syılady
11-14 jas aralyǵyndaǵy jetkinshekterge arnalǵan «Jas órken» blogynda qaýipsizdik, sport jáne ekologııalyq baǵyttaǵy is-sharalar qamtylǵan. 29 mamyr kúni Esil jaǵalaýyndaǵy Amfıteatrda «Jasyl el» eńbek maýsymynyń ashylýy ótedi.
Sondaı-aq «Bala energy» open-air festıvali, «Ethno Games ArqaLan» ulttyq sport oıyndary festıvali jáne kınologııalyq ortalyqqa ekskýrsııalar uıymdastyrylady.
Jasóspirimderge arnalǵan «Bolashaqqa qadam» blogy aıasynda 1 maýsym kúni halyqaralyq «Astana FIDA Drone Soccer Championship» dron-fýtbol chempıonaty ótedi. Amfıteatr sahnasynda «QosymshaFest» festıvali uıymdastyrylsa, qalalyq alańda opera jáne balet teatrymen birlesken «Túrli-tústi mozaıka» baıqaýy ótedi.
Eń aýqymdy «Baqytty otbasy» blogy otbasylyq qundylyqtardy dáripteýge arnalǵan. 28 mamyr kúni Paralımpıadalyq jattyǵý ortalyǵynda sporttyq-oıyn-saýyq jarystary uıymdastyrylady.
29 mamyrda MEGA Silk Way saýda-oıyn-saýyq ortalyǵynda «Shekarasyz densaýlyq» aksııasy ótedi. Onyń aıasynda turǵyndarǵa salaýatty ómir salty men aýrýlardyń aldyn alý jóninde aqparat taratylady.
30 mamyr kúni Prezıdent saıabaǵynda «Ekomamafest 2026» otbasylyq festıvali uıymdastyrylady. Al 30-31 mamyr kúnderi «Jetisý» saıabaǵynda «BópeFair» balalar festıvali ótedi.
1 maýsym kúni Ortalyq saıabaqta otbasylyq Kids RUN jarysy bastalady. Prezıdent saıabaǵynda jas otbasylarǵa arnalǵan sýret salý kýrsy uıymdastyrylyp, Ailand ortalyǵynda merekelik konsert ótedi.
Sonymen qatar mereke qarsańynda elordadaǵy birneshe aýlada jańartylǵan balalar oıyn jáne sport alańdary ashylady.
1 maýsymnan bastap Astanada mektep janyndaǵy jazǵy lagerler de jumysyn bastaıdy.
Buǵan deıin balalardyń jazǵy demalysy jańa talappen uıymdastyrylatyny týraly jazǵanbyz.
