Foto: gov.kz
Qaraǵandy oblysy TJD baspasóz qyzmetiniń aqparatynsha, serjant Jandos Aıtqalı, efreıtorlar Izbasar Tóleýtaı men Shyńǵys Erqanat 25 tamyzda tańerteń qyzmetke bara jatyp, terezeleri otqa oranyp, tútin shyǵyp jatqan birinshi qabattaǵy páterdi baıqaǵan. Oqıǵa orny mańaıynda er adamdar bolmaı, birneshe áıel kómekke shaqyryp turǵan edi.
«Kóshede biz ústindegi kıimi kúıip ketken 6-7-ler shamasyndaǵy balany kórdik. Ol ábden qorqyp qalǵan. Bizge inisi úıde qalǵanyn aıtty. Terezeden páterge kirdim. Qatty tútinnen kózim jasaýrap, aýa jutý úshin terezege birneshe ret jaqyndaýyma týra keldi, sýǵa malynǵan oramal men fonar alyp qaıta kirdim. Úshinshi ret kirgende ǵana túpki bólmede mysyǵyn qushaqtap, qorqyp otyrǵan balany taba aldym», deıdi Jandos Aıtqalı.
Áskerıler balany mysyǵymen qosa syrtqa shyǵarǵan. Kóp uzamaı órt sóndirýshiler kelip, órtti sóndirýge kirisken.
Tótenshe jaǵdaılar mınıstrligine áskerı qyzmetshilerdi marapattaý úshin vedomstvolyq nagrada tabystaý týraly usynys jiberildi.
