Memleket basshysy álemniń jetekshi ǵylymı ortalyqtarynda taǵylymdamadan ótý úshin ǵalymdarǵa 500 grant bólý týraly tapsyrma bergen-di. Osyǵan oraı 2021 jyly Halyqaralyq baǵdarlamalar ortalyǵy «500 ǵalym» ǵylymı taǵylymdama baǵdarlamasyn iske qosqan bolatyn. Baǵdarlama 2025 jylǵa deıin zertteý ýnıversıtetterinde, zertteý ortalyqtarynda jáne basqa da ǵylymı mekemelerde 3 aıdan 12 aıǵa deıingi ǵylymı taǵylymdamadan ótý úshin jyl saıyn 500 stıpendııa beredi.
«Ǵylymı zertteýlerdiń basym baǵyttarynyń tizbesi «Aqparattyq jáne kommýnıkasııalyq tehnologııalar», «Bilim berý», «Medısına», «Ulttyq qaýipsizdik jáne qorǵanys» sııaqty ózekti zertteý salalaryn qamtıdy», dedi «Halyqaralyq baǵdarlamalar ortalyǵy» AQ basqarma tóraǵasy Oljas Sákenov.
Memleket taǵylymdamadan ótýshilerge taǵylymdamadan ótý, eki jaqqa ushý shyǵyndaryn, sondaı-aq medısınalyq saqtandyrý men aı saıynǵy stıpendııany tóleıdi. Stıpendııa mólsheri qala jáne belgili bir eldegi ómir súrý deńgeıine baılanysty bolmaq.
Ǵylymı taǵylymdamany taǵaıyndaý konkýrsyna usynylatyn tizimge kiretin sheteldik uıymnan shaqyrýy bar úmitkerler qatysa alady. Sondaı-aq ǵylymı nátıjelerge, mysaly, otandyq jáne halyqaralyq ǵylymı basylymdarda jáne derekter bazasynda ındeksteletin maqalalarǵa ıe bola alady. Kandıdattardyń jalpy jumys ótili tańdalǵan mamandandyrý salasynda keminde 12 aıdy quraýǵa tıis. Sondaı-aq V1 deńgeıinen kem emes nátıjemen memlekettik til boıynsha IELTS nátıjesimen shet tili boıynsha emtıhan tapsyrý týraly sertıfıkat (9.0-den keminde 5.0) mindetti túrde bolýy kerek.
Ǵylymı taǵylymdamadan ótý úshin usynylatyn ýnıversıtetterdiń, ǵylymı ortalyqtardyń, jetekshi sheteldik uıymdardyń tizbesine álemniń 34 elinen QS World University Rankings, Academic Rankings of World Universities, Times Higher Education World TOP-250 halyqaralyq akademııalyq reıtıngine kiretin 400-den astam joǵary oqý orny, ǵylymı-zertteý ortalyqtary, uıymdar kirdi. Ǵylymı taǵylymdamadan ótýge ǵylymı zertteýlerdiń basym baǵyttarynyń tizimi 134 mamandyqtan turady. Basym mamandyqtar ınjenerlik, jaratylystaný, áleýmettik jáne gýmanıtarlyq ǵylymdar salasyndaǵy, sondaı-aq aqparattyq-kommýnıkasııalyq tehnologııalar, medısına, óner, bilim, agroónerkásiptik keshen, ulttyq qaýipsizdik jáne qorǵanys salalaryndaǵy zertteýler sııaqty baǵyttarǵa bólingen.
Tolyq aqparatty Halyqaralyq baǵdarlamalar ortalyǵynan bilýge bolady (Astana qalasy, Syǵanaq kóshesi, 70-úı, «Syǵanaq» bıznes ortalyǵy, 5-qabat, 508-kabınet).
