Buqaranyń qýanyshy eselengen bul kúni 26 adam kópbalaly otbasylar qatarynan, 35-i halyqtyń áleýmettik jaǵynan álsiz toptaǵylar bolsa, 20-sy jetim jáne ata-ana qamqorlyǵynsyz qalǵan bala men 24-i memlekettik qyzmetker sanaty boıynsha pátermen qamtyldy.
«Prezıdentimiz Qasym-Jomart Toqaev halyqty qoljetimdi baspanamen qamtamasyz etýdi kún tártibinen túsirgen emes. Búgin mereıli mereke qarsańynda «Kapstroıgrýpp-T» jaýapkershiligi shekteýli seriktestigi salǵan kópqbatty turǵyn úı kesheniniń páterleri óz ıelerin tapty. Jańa baspanalaryńyz janǵa jaıly bolyp, ósip-órkendeı berińizder», degen oblys ákiminiń orynbasary Nurjan Qudaıbergenov pen Eńbekshiqazaq aýdanynyń ákimi Altaı Dosymbaev turǵyn úı kesheniniń lentasyn qıyp, páter kiltterin ıelerine saltanatty túrde tapsyrdy.
Baspanaly bolý baqytyn saryla kútken turǵyndardyń qýanyshynda shek bolǵan joq. «О́z úıim – óleń tósegim» demekshi, sáni men sapasy úılesim tapqan turǵyn úıdiń tabaldyryǵyn attaǵan azamattardyń alǵashqy qadamdaryna shashý shashylyp, aq tilekter aqtaryldy.
Turǵyn úıdiń ınfraqurylymy tolyqtaı retke keltirilgen. Jasyl jelekpen kómkerilip, jaryq tartylǵan. Aýyz sýdan da tapshylyq bolmaıdy. Eń mańyzdysy, jylý máselesi de tolyq sheshilgen.
«Búgin otbasymyz úshin zor qýanysh. 2012 jyldan beri turǵyn úıdiń kezeginde turyp kelemiz. Basymyzda ózimizdiń baspanamyz bolsa eken dep armandaýshy edik. Mine, búgin táýelsiz eldiń azamaty retinde baspanaly bolý quqyǵyna ıe bolyp, páterimizdiń kiltin aldyq. Tól merekemiz qutty bolsyn», degen jańa qonys ıesi Rýslan Musauly júrekjardy rızashylyǵyn bildirdi.
Is-shara sońy turǵyndardyń qonystoıyna ulasty.
Almaty oblysy
