Foto: Oqý-aǵartý mınıstrliginiń baspasóz qyzmeti
«Qurmetti áriptester! Qadirli ustazdar, oqýshylar, ata-analar! Sizderdi búgingi Bilim kúnimen jáne jańa oqý jylynyń bastalýymen quttyqtaımyn! Bilimniń jańa kókjıegin ıgerýge, tyń izdenister men jahandyq maqsattarǵa umtylǵan úsh mıllıonnan astam jas órenniń aldynda jańa múmkindikter ashylmaq», delingen mınıstrdiń quttyqtaýynda.
Vedomstvo basshysynyń aıtýynsha, bıyl 130 myńnan astam oqýshy sý jańa mektepterde oqýdy bastaıdy. Aýyldyq jerlerdegi bilim deńgeıin damytýǵa da erekshe kóńil bólinip keledi. Máselen, bıyl 1 myń aýyl mektebi qaıta jańǵyrtylyp, pándik kabınetter ashylady, kitaphanalar men ashanalary, jıhazdary jańartylady. Aıta ketsek, bıyl alǵash ret aýyl mektepteri arasynda respýblıkalyq olımpıada uıymdastyrylady. Ǵanı Beısembaev atap ótkendeı, munyń bári otandyq bilim sapasyn arttyrý, balalar úshin qaýipsiz jáne qolaıly jaǵdaı jasaý maqsatynda qolǵa alyndy.
«Aınalaıyn, baldyrǵandar, birinshi synyp oqýshylary! Búgin sizderdiń ómirlerińizdegi eń qyzyqty ári mańyzdy kún. Alǵashqy qońyraýdyń syldyrymen tańǵajaıyp bilim álemine saıahatty bastaısyzdar. Bıyl 366 myń búldirshin mektep tabyldyryǵyn attap, birinshi synypqa barady. Al, 11 synyptaǵy 188 myń oqýshy úshin bul altyn uıanyń qabyrǵasyndaǵy sońǵy jyl.
Búgingi kúnniń ata-analar úshin de mańyzy erekshe. Perzentin mektepke daıyndap, qobaljıtyn sát. Árkim óziniń oqýshy bolǵan kezderin saǵynyshpen eske alatyn kún. Bıyl alǵash ret kolledj stýdenti atanǵan 190 myń jas úshin bul - úlken ómirge alǵashqy qadam jasaıtyn sheshýshi kún.
Bizdiń muǵalimder úshin bul kún súıikti jumysyna oralatyn, shákirtterimen qaýyshatyn kún. Osy aıdan bastap mektepke deıingi bilim berý uıymdaryndaǵy 100 myńǵa jýyq pedagogtiń jalaqysy 30% - ǵa, al kolledj stýdentteriniń stıpendııasy 50%-ǵa ósedi.
Qadirli áriptester!
Jańa oqý jyly árqaısyńyz úshin qyzyqty ári paıdaly bolsyn! Sizderdiń barlyq bastamalaryńyzǵa sáttilik, otbasylaryńyzǵa amandyq, denderińizge saýlyq tileımin! Bilim kúni qutty bolsyn!», dep tilegin jetkizdi mınıstr.