Foto: «QazMunaıGaz» UK AQ baspasóz qyzmeti
Jańaózen qalasyna aýyz sý «Astrahan-Mańǵystaý» sý qubyrymen Qıǵash ózeninen Jaıyq sýyn tasymaldaý arqyly jetkiziledi. Búgingi tańda bul – Atyraý jáne Mańǵystaý oblystarynyń birqatar eldi mekenderi paıdalanyp otyrǵan jalǵyz tirshilik kózi. Halyq sanynyń ósýi jáne jańa kásiporyndardyń ashylýy sý tutyný kóleminiń kúnnen kúnge artýyna áser etip jatqanyn aıta ketý kerek.
Qaraqııa aýdanyndaǵy Toqymaq tóńireginde qýaty táýligine 50 myń tekshe metrdi quraıtyn teńiz sýyn tushytý zaýytynyń qurylysy Jańaózen halqyn aýyz sýmen qamtamasyz etýge múmkindik beredi.
«QazMunaıGaz» UK AQ Basqarma Tóraǵasy Maǵzum Myrzaǵalıev jınalǵandardy aıtýly oqıǵamen quttyqtap, óńirdiń áleýmettik máselelerin sheshetin bul jobanyń strategııalyq mańyzy joǵary ekenin aıtty.
«Shalǵaıda turatyn halyqtyń ál-aýqatyn jaqsartý - QazMunaıGazdyń basty maqsattarynyń biri. Memleket basshysynyń tikeleı tapsyrmasyn sapaly ári qysqa merzimde oryndap, Jańaózendegi aýyz sý tapshylyǵyna qatysty máseleni túbegeıli sheshý qajet», dedi QMG basshysy.
Aıta ketsek, sý tushytý zaýytyn salý óńirde júzdegen jańa jumys ornyn ashýǵa múmkindik beredi. Qurylys kezinde 240 adam, zaýyt iske qosylǵannan keıin 100-den astamy jumyspen qamtylady.
О́z kezeginde, Mańǵystaý oblysynyń ákimi Nurlan Noǵaev jańa óndiris orny óńir ekonomıkasynyń damýyna oń áser etetinin málimdedi.
«Prezıdent Qasym-Jomart Toqaev Mańǵystaý oblysyna jumys sapary barysynda halyqty sapaly aýyz sýmen qamtýdyń mańyzdylyǵyna toqtalyp, Úkimet pen oblys ákimdigine sýmen qamtý máselesin sheshýdi tapsyrdy. Osy maqsatta óńirde birneshe joba iske asyrylyp jatyr. Toqymaq tóńireginde sý tushytý zaýytyn salý «Astrahan-Mańǵystaý» qubyrynan keletin sýǵa qosymsha retinde Jańaózen jáne basqa da eldi mekenderdi sýmen qamtamasyz etýge múmkindik beredi. Bul týrızmdi, kásipkerlikti jáne aýyl sharýashylyǵyn damytýǵa mýltıplıkatıvti áser etedi», dedi N.Noǵaev.
Qurylys aldyn ala josparǵa saı 2024 jyldyń sońyńa qaraı aıaqtalady. Al 2025 jyldyń kókteminde óndiris orny tolyq jobalyq qýatyna shyǵady dep josparlanyp otyr.
