FOTO: inbusiness.kz
«Bizdiń armııa joǵary tehnologııaly qarý-jaraqpen jáne áskerı tehnıkamen, sonyń ishinde brondy tehnıkamen, ushqyshsyz ushatyn apparattarmen, zamanaýı atys qarýlarymen qamtamasyz etilýge tıis», dedi Prezıdent. Tehnıkany jóndeý baǵytyn damytýdy da tapsyrdy.
Negizi qorǵanys ónerkásibi kesheni – aýqymdy sala. Kóp elde qorǵanys jáne azamattyq maqsatta ónim shyǵaratyn kompanııalar eldiń ındýstrııalanýyna áser etedi. Tek jumysty júıeli uıymdastyrý kerek. Meniń bilýimshe elimizde áskerı jáne azamattyq salaǵa qajet ónim shyǵaratyn 40-tan asa kásiporyn bar. Olardyń 31-i tikeleı qorǵanys salasyna kerek dúnıelerdi jasaıdy. Jýyrda taǵy da birneshe kásiporyn qurylýy múmkin. Máselen, áskerıler synaqtan ótkizip jatqan «AnkaS» dronyn qurastyratyn ónerkásip ashylýǵa tıis. Drondardy armııa kelesi jyldyń kóktemine deıin synaıdy. Zaýyt sodan soń salynatyn shyǵar.
Petropavlda ızraıldikterdiń tehnologııasy boıynsha «Tarlan» deıtin dúrkindetip atatyn qondyrǵy jasalyp jatyr. «Qazaqstan ınjınırıngtiń» ózime unaıtyn biraz kásiporyny bar. Máselen, «Kazakhstan Aselsan Engineering» drondarǵa qarsy qoldanatyn «Antıdron» radıoelektrondy kúres tehnıkasyn qurastyrady. Bizdiń «Zenıt» Oral zaýyty» men Túrkııanyń «Asfat» kompanııasy áskerı kemelerdi birlese jasaýǵa kelisken. Fransýzdarmen birlesip radar qurastyryp júrmiz. Qytaılarmen de baılanys ornatýdamyz. Áskerı tehnıkalardy jetildirýde teriskeıge ǵana qarap otyrǵan joqpyz. Qysqasy, búginge deıin qorǵanys ónerkásibinde azdy-kópti tabysymyz bar. Endi sol tabysty ulǵaıtý qajet. Prezıdent tapsyrdy, Úkimet oryndaýǵa tıis.
Negizi qorǵanys ónerkásibi keshenine qatysty túrli usynys aıtýǵa bolady. О́z basym Úkimet eń aldymen brondy tehnıka jasaýǵa nıettengen kásiporyndarǵa «STANAG 4568» standarttaryna saı bolý talabyn qoıǵany jón degen pikirdemin. «Brondy kólik jasadyń ba, «STANAG 4568» standartyna saı ekenin dáleldeıtin sertıfıkat usynatyn ortalyqtarda synaqtan ótkizýge mindettisiń, sodan soń bizdiń áskerıler synaıdy», deıtin talap bolsa degen tilek bar. Bul – halyqaralyq standart. NATO-nyń standarty. О́nerkásipti lokalızasııalaý kezinde naqty talap ta qoıylǵany jón. Qurastyrý jumystarynan bastap, ekinshi, úshinshi deńgeıli lokalızasııa talaby oryndalsa, Prezıdent bergen tapsyrma óz nátıjesin beredi.
Qysqasy, qorǵanys ónerkásibi keshenin damytý Úkimet mindetteriniń birine aınalaıyn dep tur. Buıyrtsa, bul saladaǵy jetistikter men atqarylyp jatqan isterdi udaıy baqylap otyramyz.
Amangeldi QURMETULY,
«Aıqyn» gazetiniń
bas redaktory
