Kórme eki taqyryptan turady. Birinshisi, áıgili ertegi keıipkerlerin beıneleý arqyly koreı dástúrli kıimin tanystyratyn «Ertegilerdegi hanbok» serııasy bolsa, ekinshisine «Hanbok kıgen qyz» degen ataý bergen. Kórmege talantty sýretshiniń 24 jumysy qoıyldy. Onyń týyndylary ulttyq naqyshqa baı, ásirese «hanbok» kıimine negizdelgen dástúrli elementterdi qamtıdy.
Birneshe elde kórmesi ótken Ý Naıon týyndylary dúnıe júzine óte tanymal. Sonymen birge ol Netflix, Disney, Marvel, Samsung, LG jáne taǵy basqa ataǵy jer jarǵan álemdik brendtermen birlesip jumys istegen. 2019 jyly Koreıa Respýblıkasy Mádenıet, sport jáne týrızm mınıstrliginiń «Hanbokti nasıhattaýǵa qosqan úlesi úshin» syılyǵyn ıelengen.
Mádenı is-sharanyń ashylýynda Ulttyq mýzeı dırektorynyń mindetin atqarýshy Aıbek Sydyqov eki el arasyndaǵy mádenı-rýhanı baılanys pen kórmeniń mańyzyn atap ótti.
«Qazaqstan men Koreıa arasyndaǵy, onyń ishinde mádenıet salasyndaǵy qarym-qatynas qarqyndy damyp keledi. Búgingi is-shara da osy mádenı yntymaqtastyq baǵytynda ótip otyr. Kórmeniń de mazmuny óte baı. О́ıtkeni ony kórgender koreı eliniń dástúrimen, mádenıetimen, tarıhymen tanysyp, rýhanı baıı túsedi», deı kelip, sonaý Koreıadan at arytyp kelgen qylqalam sheberine rızashylyǵyn jetkizdi.
Odan keıin Qazaqstandaǵy Koreıa Respýblıkasynyń Tótenshe jáne ókiletti elshisi Chjo Teık jınalǵan qaýymmen qazaqsha amandasyp, qazaq tilinde sóıledi. Buǵan ishimiz jylyp qaldy.
«Qurmetti dostar!» – dep bastady sózin elshi. – Byltyrdan bastalǵan Koreıa men Qazaqstannyń ózara mádenı almasý jyly aıasynda birneshe is-shara uıymdastyryldy. Al 2023 jáne 2024 jyldar Koreıaǵa barý jyly bolyp jarııalandy. Sondyqtan ýaqyttaryńyz ben múmkindikterińiz bolsa, osy jyl sheńberinde Koreıa eline saıahattap, onyń tarıhymen, dástúrimen jaqyn tanysýǵa bolady. Bıylǵy kóktemde Tuńǵysh Prezıdent kitaphanasynda koreı fotosýretshileriniń kórmesi boldy. Myna is-shara da sonyń jalǵasy dep aıta alamyz. Munda sýretshiniń koreı halqynyń san ǵasyrdan beri saqtalǵan mádenıeti men dástúrli ulttyq kıimin zamanaýı úlgimen ásem úılestirip, ádemi beınelegen jumystary usynyldy. Sondyqtan osy is-sharany ótkizýge belsene atsalysqan barsha azamatqa alǵysymdy aıtamyn», dedi ol.
Shynynda, Ý Naıon óz shyǵarmashylyǵynda dástúrli qoǵam men qazirgi zaman beınelerin qısynyn taýyp, sheber úndestiredi. Ol «Hvan Chjın I» telehıkaıasyn kórgennen keıin shabyt alyp, koreı dástúrli kıimi «hanboktiń» sulýlyǵyn beıneleıtin ıllıýstrasııalar sala bastaǵan. Sýretshi negizgi jumystarynda basty keıipkerlerdi «hanbokte» beıneleý arqyly Shyǵys pen Batystyń úzdik dúnıelerin jańasha túsindiredi. Onyń úlgisi retinde Batys ertegilerindegi hanshaıymdardyń kórinisteri men Gollıvýd akterleriniń koreı keskindeme stılindegi beınelerin aıta alamyz.
Máselen, avtordyń kórmege qoıylǵan «Aqqý hanzada», «Aqshaqar – Aqshaqar men janýarlar», «Sulý men qubyjyq», «Alısa ǵajaıyptar elinde», «Qyzyl telpek» jáne taǵy basqa da koreıdiń «hanchjı» qaǵazyna jıkle tehnologııasymen basyp shyǵarǵan jumystary minsiz sulýlyǵymen, tabıǵılyǵymen, qanyq boıaýymen kóz tartady. Sondaı-aq sýretshi koreılerdiń túrli naqyshtaǵy ulttyq kıimderin bederlegen ıllıýstrasııalary arqyly óz halqynyń dástúrine tán erekshelikti, sypaıy bolmysty, ásemdikti aıshyqty jetkizgen.
Ý Naıonnyń bizdiń elimizdi tanyp-bilýi de qyzyq. Ony ózi aıtyp berdi. «Birde teledıdardan Qazaq jerinde turatyn etnostyq koreıler týraly túsirilgen derekti fılmdi kórip, osy elge ózimniń bir jaqyndyǵym bar ekenin sezindim. Men úshin ásirese qazaqstandyq koreılerdiń urpaqtan-urpaqqa óz tili men dástúrin saqtap kele jatqany óte áserli boldy. Sonymen qatar jergilikti koreılerdiń ulttyq taǵamy aıryqsha tańǵaldyrdy. Mysaly, «kımchı» koreı dástúrli jeńil tamaǵy qazaqstandyq qospalarymen tolyǵyp, dámdi «koreı salatyna» aınalǵan. Sondyqtan men mindetti túrde osy elge barýym kerek dep oıladym. Mine, sáti túsip ortalaryńyzda turmyn. Buǵan óte qýanyshtymyn. Búgingi kórmege kelgen qonaqtar «hanboktiń» erekshe sulýlyǵyn sezine alady dep senemin», dedi ol.
Bul kórmeniń taǵy bir ereksheligi retinde sýretshiniń halqymyzdyń «Er Tóstik» qııal-ǵajaıyp ertegisi negizinde beınelegen eńbegin bólek aıtsaq bolady. Bul týyndy eki el arasyndaǵy mádenı almasý jyly aıasynda arnaıy salynǵan. Shyǵarmada sýretshi qazaq ertegisi men dástúrli koreı mádenıetin sabaqtastyra otyryp, Er Tóstiktiń jolynda kezdesken qıyndyqty qajymas kúsh-qaırattyń arqasynda jeńgenin beıneleıdi.
«Búginge deıin biraz elde kórme ótkizdim. Soǵan daıyndyq kezinde sol eldiń bir ertegisiniń jelisimen sýret salǵandy jaqsy kóremin. Osynda kórme ótkizetin bolǵandyqtan, Qazaqstandaǵy Koreı mádenı ortalyǵy maǵan biraz qazaq ertegilerin jiberdi. Sonyń ishinen «Er Tóstik» ertegisin oqyp, qatty unattym. Bul erteginiń bas keıipkeri Er Tóstik – boıynda kúsh-qaıraty tasyǵan jigit. Aǵalaryn izdep jolǵa shyqqanda oǵan janashyr bolǵan keıipkerlerdiń ózi – qyzyqty beıneler. Máselen, Kóltaýysarǵa uqsas keıipker bizde de bar. Mine, osynyń bári maǵan áser etip, jaqsy týyndy dúnıege keldi», dedi qylqalam sheberi.
Aıta keteıik, Ý Naıonnyń kórmesi 15 qazanǵa deıin jalǵasady.
