Kerekýdiń Aqtoǵaı aýdanyn meken qylǵan Mereke jáne Gúlzat Janshoqov otbasy aınalasyna syıly, ónegeli shańyraq atanyp otyr. Sáni men saltanaty jarasqan, berekeli januıa kim-kimge bolsyn úlgi. Otbasynyń basty tiregi, qazyǵy bala desek, urpaqtyń tárbıeli bolyp ósýine otbasyndaǵy berekeniń áseri mol. Gúlzat – jeti balany dúnıege ákelgen Altyn alqaly ana. Balalarynyń barlyǵy jas, aldy mektep qabyrǵasyndaǵy ortańǵy býynǵa endi jetkenine qaramastan ol memlekettik qyzmet salasynda eńbek etýge de úlgerip júr.
Otaǵasy Mereke Janshoqovtyń ózi polısııa qyzmetinde tabany kúrekteı 24 jyl tapjylmastan qyzmet etip keledi. Uzaq jylǵy adal eńbegi arqyly satylap ósip, polısııa podpolkovnıgi shenin ıelendi. Qazir aýdandyq jergilikti polısııa qyzmetin basqaryp, aýmaqtaǵy qoǵam tynyshtyǵy men tártiptiń saqtalýyna jaýap beredi.
«Alǵashqy qyzmet jolym batalondyq polısııadan bastalǵan edi. Keıin aýyldyq jerde ýchaskelik ınspektor boldym. Úıden erte ketip, tún ortasynda kelemin. Keıde jubaıym men balalarym meni aptalap kórmeı qalatyn kezderi de bolady. Barlyǵy jumys babyna qatysty bolǵan soń, úıdegiler qabaq shytyp, túsinispeýshilik tanytqanyn kórmeppin. Aǵaıyn-týys bolǵan soń toı-tomalaqqa jıi shaqyrady. Alaıda olarǵa barýǵa múmkindigimiz kelmeı jatady. Sondaı sátterde kelinshegim renish tanytyp, keıigen emes. Osyndaı túsinistik, bir-birimizge degen syılastyq pen adal mahabbat, ózara senim otbasymyzdyń berekesi artýyna sebep dep oılaımyn. Tipti aılap issaparǵa shyǵyp ketetin ýaqytta da otbasymda uıyǵan tirliktiń saqtalyp turǵanyna esh kúmánim bolmaıdy. Kishkentaılarymyz shetinen tárbıeli, anasynyń aıtqanynan shyqpaıtynyn kórip rıza bolatynym da bar. Sharshaǵan sátterdegi kóńil kúıimizdi qabaǵymyzǵa qarap uǵynyp otyrady», deıdi Mereke Shaǵybanuly.
Gúlzattyń ózi memlekettik qyzmet salasynda 14 jyldaı istegen. Balalarynyń aldy 13-ke endi jetken ananyń qaısarlyǵy men eńbekqorlyǵyna tańǵalmasqa shara joq. «Úıde balalar tárbıesi, túzde qyzmetpen aınalysýǵa ýaqyt qalaı tabasyz?» dep suradym.
«Serigim bes qyzdyń arasynda jalǵyz er bala bolyp ósken eken. Otbasy qurǵan soń tuńǵyshymyzdan keıingi bala ul, odan soń birinen soń biri qyz balalar dúnıege kelgende enemniń oıynda óz ulynyń sońynan jalǵyz er bala ǵana erip qala ma degen kúdik bolypty. Keıin taǵy er balany ómirge ákelgenimde, ol kisiniń rıza bolǵanyn kórseńiz, deıdi jymıyp kópbalaly ana. – Men úshin áýlet úlkenderiniń úmitin aqtaý paryz dep oılaımyn. Al shańyraǵymyzdyń sáni – balalarymyz, aldaǵy ǵumyrymyzdyń barlyq máni solar bolyp ótetinin túısindim».
Qazirgi kúni tuńǵysh qyzdary oblys ortalyǵyndaǵy kópsalaly daryndy balalarǵa arnalǵan lıseı-ınternatynda bilim alyp jatyr. Uldarynyń úlkeni – kekýshınkaı-karatedan túrli deńgeıdegi jarystyń birneshe dúrkin jeńimpazy. Balalary ákesindeı qaıratty, sportshyl, namysqoı bolyp ósse degen armany bar.
Gúlzattyń pikirinshe, otbasy berekesiniń kilti – erli-zaıyptylardyń birin-biri tyńdaı bilýinde. Otbasy bolǵan soń ydys-aıaq syldyramaı turmaıtyny belgili. Áıel adam tózimdilik turǵysynan erine qaraǵanda eki ese berik bolýǵa tıis, bir-birimizdi únemi qoldap, qıyn sátte súıeý bolýymyz kerek dep esepteıdi.
«Shańyraǵymyzda buljymas dástúrge aınalǵan qundylyqtardyń qalyptasýyna ata-anamyzdyń bizge bergen oń tárbıesi yqpal etti dep oılaımyn. Anam ár kez er azamatyńnyń altyn basyn qadirleseń utylmaısyń, sabyrly bol, urpaǵyńa ónegeli tárbıe ber degen aqylyn aıtyp otyrady. Ata-enemniń qoldaýyn da aıryqsha sezinemin. «Uıada ne kórseń, ushqanda sony ilersiń» degen asyl sóz tekke aıtylmaǵan», deıdi ana.
Pavlodar oblysy,
Aqtoǵaı aýdany
