Foto: gov.kz
«Kezdesýde Konsorsıým qyzmetindegi ózekti máseleler, jańa ınvestısııalyq jobalardy júzege asyrý jáne respýblıkanyń tabıǵatty qorǵaý zańnamasynyń saqtalýy talqylandy. Úkimet basshysy elimizdi munaı-gaz resýrstarymen qamtamasyz etýde Qashaǵannyń róli mańyzdy ekenin atap ótti. Bul tek óndirý operasııalaryna ǵana emes, sonymen birge kómirsýtek shıkizatyn keshendi óńdeýge de qatysty. Osyǵan baılanysty Memleket basshysynyń halyqqa Joldaýyndaǵy tapsyrmalaryn júzege asyrý sheńberinde gaz óńdeý qýatyn arttyrý úshin jańa zaýyttardyń qurylysyn tezdetý qajettigi aıtyldy. Budan bólek, Premer-mınıstrdiń aıtýynsha, Konsorsıýmnyń negizgi mindeti ekologııalyq qaýipsizdikti qamtamasyz ete otyryp, ken oryndaryn tolyq ıgerý máseleleri bolýǵa tıis. Kezdesý qorytyndysy boıynsha taraptar ınvestısııalyq jobalardy júzege asyrý barysynda týyndaıtyn barlyq máselelerdi Qazaqstan zańnamasynda bekitilgen quqyqtar men mindetterdi saqtaı otyryp, syndarly jolmen sheshýge daıyn ekendikterin bildirdi», delingen aqparatta.
«EksonMobıl Qazaqstan» basqarýshy dırektory Sesıl Rolın, «CNPC Qazaqstan B.V.» bas dırektory Sıandýn Chjý, Qazaqstandaǵy «Shell» konserniniń aǵa vıse-prezıdenti jáne basshysy Herman Býrmaıster, «TotalEnergies Qazaqstan» bas dırektory Frýde Iýnes, «Adjıp Kaspıan Sı b.v.» basqarýshy dırektory Matteo Tısı, Qazaqstandaǵy «INPEKS Nort Kaspıan Sı ltd» fılıalynyń dırektory Hıroshı Ikeda jáne Qazaqstan Respýblıkasynyń ortalyq memlekettik organdarynyń jáne «QazMunaıGaz» ulttyq kompanııasynyń basshylary qatysty.
Úkimet basshysy Á.Smaıylov: «Konsorsıýmnyń munaı-gaz salasyn damytýǵa qosqan úlesin joǵary baǵalaımyz jáne uzaq merzimdi yntymaqtastyqty odan ári keńeıtýge múddelimiz», dedi
