Foto: instagram/bekzhan_turys
Jaqynda Almatydaǵy óner ordasy Muhtar Áýezov atyndaǵy Qazaq ulttyq drama teatrynyń 98-maýsymy ashyldy. Teatrdyń ardager akteri jańa qoıylymnyń qyzý daıyndyǵyna baılanysty áleýmettik jeliden qol úzip qalyp, dombyraǵa baılanysty jat aǵymnyń jeteginde ketkenderdiń aıtqanyn endi ǵana estigenin aıtty.
«Qolynan dombyra tastamaǵan qazaqtyń biri retinde buǵan beıjaı qaraı almaımyn. 70 jyl orystyń bodanynda otyrǵanda óz ultymnyń aýzymen «qazaqtyń dombyrasy - aram» degendi eshkim aıtqyzbap edi. Umytpasam, «Terme» deıtin habar da júrdi efırde. Al Táýelsizdik alǵan soń bizge ne kórindi, aǵaıyn? Túsingim-aq keledi, biraq… Dinniń atyn jamylyp ulttyq qundylyqtarymyzǵa tıisý qaıdan shyqty? Qaı kezde beleń aldy bul?
Dinge japqymyz keledi, anyǵynda, ultynyń qasterli murasynan bezgen hám teris aǵymnyń jetegine ergen «shirigen jumyrtqa» bolǵandardyń túsinigi bul. Áıtpese kez kelgen halyqtyń dástúrli mádenıeti men dinı tanymy óz ulty úshin qasıetti sanalatynyn bilmeı me búkil qazaq? Dombyra - qazaqtyń jany, babadan qalǵan baǵzy mura. Biraq kóne zamannan beri qazaqtyń júrek qylyn, dalanyń tereń tarıhy men san ǵasyrlyq shejiresin shertip kele jatqan ulttyq aspapty qazaqtan aıyrý bastalǵan sııaqty», dep jazdy Bekjan Turys Facebook paraqshasynda.
Onyń aıtýynsha, bul shýdy áldekimder ádeıi uıymdastyrǵan bolýy múmkin. Bir mezgilde birinen soń biri bir sarynda aıtyp jatqan sózder ony osyndaı oıǵa jetelepti.
«Dombyrany «haram» dep júrgen jat aǵymdaǵylardyń áreketine tyıym salynýy kerek, ýaqyty keldi. Tutas ult bolyp ulttyq aspabymyz - qasıetti dombyradan qazaqty bezdirgisi keletinderge jaýap retinde qolynan dombyrasy túspegen dástúrli ánshi-kúıshilerden bastap, bar qazaqtyń áleýmettik jelide tek dombyra jaıly arnaıy post jarııalap otyrýyn ótinem. Qaǵynan jerigenderdiń teris nasıhatyna, ózge aǵymǵa kirip dástúr-saltymyz ben ulttyq mádenıetimizge qarsy shabýyl jasaıtyndarǵa arnaıy zań qabyldanyp, belgili bir shara qoldanǵansha bul chellendj úzilmese deımin. Ár qazaq arnaıy post jazbasa da, dombyramen aıtylǵan án nemese kúıdi paraqshasyna kúnde jarııalap otyrýǵa tıis. Usynys-ótinishime nemquraıdy qaramaıdy dep senem. Qazaqty dástúr-saltynan, ulttyq mýzykasynan aıyryp, ult retinde joıǵysy keletin arampıǵyldardyń áreketine jol joq. Osyny túsinetin kez jetti. Súrinip ketpe, qazaq balasy, súrinip ketpe!» delingen jazbada.
