Foto: ashyq derekkóz
Kúrdeli jáne ornyqty ekonomıkaǵa ónimdi ortasha jáne joǵary deńgeıde óńdeý segmentterin belsendi ıgeretin óńdeý ónerkásibi negiz bolatyny belgili. Sonymen qatar bul baǵytta kedergilerdiń kóptigi kásiporyndar «ǵumyrynyń» uzaqqa sozylmaýynan baıqalady. Prezıdent te bul máseleni kóterip, Qazaqstandaǵy bıznes-ahýal áli de jetildirýdi qajet etetinin aıtty.
«Elimizdegi kompanııalardyń tórtten biri ǵana ashylǵannan keıin ekinshi jyly naryqta qalady. Salystyrar bolsaq, bul kórsetkish basqa elderde 70-80 paıyzǵa teń. Kóp jaǵdaıda bul Qazaqstandaǵy bıznes-ahýaldyń áli de jetilmegenin kórsetedi. Biraq munyń basqa da aspektileri bar. Máselen, qazirgi jaǵdaıda kóptegen el ishki naryqty qorǵaý jáne qoldaý sharalaryn belsendi qoldanyp jatyr. Osy ozyq tájirıbeni batyl ári keńinen meńgerýimiz kerek. Men muny Úkimetke aıtyp otyrmyn», dedi Memleket basshysy.
Prezıdenttiń aıtýynsha, Qazaqstanda óndiristiń jergilikti úlesin arttyrý úshin qolaıly jaǵdaı jasalǵan. Salyqtyq preferensııalar men jeńildetilgen nesıelendirý beriledi, sondaı-aq ónimdi ótkizý boıynsha kómek kórsetiledi. Alaıda taýar óndirisiniń jergilikti úlesi ázirge tómendeý.
«Shyn máninde, biz ımportty sýbsıdııalaý isin jalǵastyryp jatyrmyz. Bul óndiristiń bastapqy qalyptasý satysyndaǵy tabıǵı qubylys ekenin túsinemin. Sondyqtan atalǵan máselege «ósim derti» retinde qaraımyz. Eshteńe bolmaǵannan góri, osyndaı óndiristiń bolǵany durys. Alaıda Úkimet óndiristiń jergilikti qamtý úlesin arttyrý máselesimen muqııat jáne jan-jaqty aınalysýǵa tıis. Keıbir kompanııalar jergilikti qamtý úlesine eńbekaqy tóleý qoryn, kommýnaldyq qyzmetterge jáne jarnamaǵa jumsalǵan shyǵyndardy qosatyn jaǵdaıǵa jetti. Mundaı kózboıaýshylyqtyń bizge qajeti joq. Bul jerde «Atameken» palatasynyń róli anaǵurlym belsendi ári paıdaly bolýǵa tıis», dedi Prezıdent.
