Foto: ashyq derekkóz
«Jalpy alǵanda, Qazaqstanda shaǵyn jáne iri bıznes úshin óte jaqsy jaǵdaı jasalǵan. Iri bıznes ornyqty damyp keledi jáne tabysy mol. Ol úshin memlekettik saıasat qoldanystaǵy erejelerdiń turaqtylyǵyn qamtamasyz etýi, favorıtızm men básekege qabiletsiz tájirıbelerdiń bolýyna jol bermeýi mańyzdy. Bul baǵytta belsendi jumysty jalǵastyramyz», dedi Prezıdent otandyq bıznes ókilderimen kezdesý barysynda.
Qasym-Jomart Toqaevtyń aıtýynsha, shaǵyn kásipkerlik jumyspen qamtý isinde jáne halyqtyń tabysyn arttyrýda asa mańyzdy ról atqarady. Bul rette salyq barynsha tómendetildi, tekserý is júzinde joq, qoldaý quraldary bar, ozyq ári jaıly sıfrlyq orta quryldy, ákimshilik kedergiler udaıy azaıyp keledi.
«Alaıda bizde ony bıznestiń eń mańyzdy orta segmentine kóshirý úshin yntalandyrý joldary qarastyrylmaǵan. Osy rette orta bıznestiń syrtqy naryqta damýy, básekege qabiletti jańa ónimderdi óndirýi jáne ony eksportqa shyǵarýy úshin múmkindikteri men aıtarlyqtaı yntalandyrý quraldary bar», dep qosty Prezıdent.
Memleket basshysy atap ótkendeı, orta kásipker áldeqaıda shıraq, mobıldi jáne qubylmaly naryqtyq jaǵdaılarǵa tez beıimdeledi.
«Iá, sońǵy 7 jylda IJО́-degi shaǵyn jáne orta kásipkerlik úlesiniń óskeni baıqalady. Biraq bul dınamıkanyń negizgi qozǵaýshy kúshi – shaǵyn kásipkerlik sýbektileri. Olardyń sany 46 paıyzǵa kóbeıdi. Osy oraıda orta kásipkerlik tek 0,5 paıyzǵa ósip, ekonomıkadaǵy úlesin 5 paıyzdan 6,2 paıyzǵa deıin arttyrdy. Bul rette EYDU elderinde onyń úlesi orta eseppen 18 paıyzǵa teń, al jekelegen memleketterde odan da joǵary, ıaǵnı 26 paıyzǵa deıin. Dál osy orta bıznesti, ásirese óńdeý ónerkásibindegi kásipkerlikti qoldaý úshin elimizde eshqandaı erekshe jaǵdaı jasalmaǵan. Kerisinshe, qazirgi normatıvti ortada, olarǵa, tipti keńeıgen kezde de, formaldi túrde shaǵyn bıznes bolyp qalý tıimdirek. Úkimetke jáne «Atameken» palatasyna osy másele boıynsha usynys engizip, naqty iske kóshýdi tapsyramyn», dep túıindedi Qasym-Jomart Toqaev.
