Atalǵan másele oblystyq ákimdikte 2023-2024 oqý jylyna tehnıkalyq jáne kásiptik kadrlardy daıarlaýǵa arnalǵan memlekettik bilim berý tapsyrysyn ornalastyrý jónindegi komıssııa otyrysynda da aıtyldy. Jıynda memlekettik bilim berý tapsyrysyn qaıta qaraý, tapsyrys ornalastyrylatyn uıymdardyń tizbesin anyqtaý máselesi qaraldy. Sonymen birge memlekettik granttardy bilim berý uıymdaryna úılestirý jónindegi túıtkilder de tarqatyldy.
О́ńirde komıssııanyń hattamalyq sheshimimen 70 mamandyq boıynsha jalpy 15300 orynǵa memlekettik tapsyrys berilgen bolatyn. Búginde tehnıkalyq jáne kásiptik, orta bilimnen keıingi bilim berý uıymdary tarapynan atalǵan memlekettik tapsyrys oryndalyp otyr. Iаǵnı 15 myńnan asa jas kolledjderde tegin oqyp, jumyssyz qaldyrmaıtyn jumysshy mamandyǵyn alatyn bolady. Oblys kolledjderine 2022 jyly 17 myń grant bólinip, onyń 11 110-y ıgerilip, qalǵan 5 900-i ıgerilmeı keri qaıtarylǵan bolatyn. Al bıyl respýblıkalyq bıýdjetten qarastyrylǵan 15 300 grant 43 kolledj arqyly tolyq ıgerildi. О́tken jylmen salystyrǵanda kolledj stýdentteri 4 myńǵa kóbeıdi. Mamandyq túrine qaraı bir stýdentke bıýdjetten bólinetin jyldyq oqý quny 850 myń teńge men 1 mln teńge aralyǵynda qalyptasyp otyr. Bıyl granttardy ornalastyrýda ashyqtyq qaǵıdaty qatań saqtaldy. Degenmen jıynda Qazyǵurt, Túlkibas, Ordabasy, Saýran, Otyrar, Tólebı aýdandary men Kentaý qalasynda memlekettik tapsyrysty ornalastyrýda jergilikti ákimdikter men kolledjder arasyndaǵy baılanystyń durys jolǵa qoıylmaǵany aıtyldy.
О́ńirde 14-35 jas aralyǵyndaǵy jastar sany – 654 353 nemese halyq sanynyń 30 paıyzyn qurap otyr. Olarǵa jan-jaqty qoldaý kórsetý, jastar saıasaty salasyndaǵy jumystardy jandandyrý – ýaqyt talaby. Bul oraıda jastar saıasatyn júrgizý, jastarǵa qoldaý kórsetý jumystary jańasha formatqa kóship, jumys tásili ózgertilgen. Oblystyq qoǵamdyq damý basqarmasynyń málimetinshe, bıyl NEET sanatyndaǵy jastar úlesin azaıtý maqsatynda 12 memlekettik baǵdarlama aıasynda 38 757 jasty jumyspen jáne oqý granttarymen qamtý josparlanǵan. Búginge deıin memlekettik baǵdarlamalarǵa jalpy 31 236 jas tartylǵan. Bıyl 2021-2025 jyldarǵa arnalǵan kásipkerlikti damytý jónindegi ulttyq jobasyn júzege asyrý maqsatynda 33 252 (46,1 paıyz) jas jumyspen qamtýǵa joldandy. Onyń ishinde 10 016-sy (47,5 paıyz) turaqty jumys ornymen qamtyldy. «Jasyl el» jastar jasaǵy boıynsha 1 989 órenge jumys orny bólingen, qamtylǵany – 955. «Serpin-2050» memlekettik baǵdarlamasyna 3653 grant berilgen bolatyn, sonyń ishinde qazirgi tańda oblys boıynsha aýdan, qaladan 864 talapker jiberildi. О́ńirdiń «Agrarlyq nesıe korporasııasy» AQ arqyly jastarǵa arnalǵan jeńildetilgen 2,5 paıyzdyq nesıe berý boıynsha bıyl 594 jasty qamtý josparlanyp otyr, jalpy qarajat kólemi – 2 mlrd 970 mln teńge. Oblys kóleminde aýdandyq, qalalyq Jastar resýrstyq ortalyqtaryna bekitilgen aptalyq josparǵa sáıkes, 2,5 paıyzdyq shaǵyn nesıe boıynsha 325 kezdesý jáne ashyq esik kúni ótkizilgen. Búginge deıin nesıe boıynsha berilgen 648 ótinimniń 407-isi komıssııadan ótip, onyń ishinde 172 jas nesıe alǵan.
Aıta ketelik, oblys kóleminde memlekettik baǵdarlamalar, sonyń ishinde «Jastar praktıkasy» arqyly 3 167, «Qoǵamdyq jumysqa» – 5 893, «Áleýmettik jumys orny» negizinde – 1 668, «Alǵashqy jumys orny» arqyly 1 199 jas jumyspen qamtylyp otyr. Oblys ákimdigi jastar arasyndaǵy jumyssyzdyq deńgeıin tómendetý, olardy jumysqa ornalastyrý baǵytyndaǵy is-sharalar josparly túrde júrgiziletinin málimdedi.
Túrkistan oblysy
