Joǵary jáne arnaýly oqý oryndarynyń stýdentteri Saıram turǵyn alabynda ornalasqan Saıram qalashyǵy (Isfıdjab), Abdel-Azız bab, Ibragım-ata, Qoja Salıh, Miráli bab, Qarashash ana keseneleri men Qyzyr munarasy sekildi áýlıeli jerlerdiń mańyn tazalady. Jastar kıeli oryndardyń aınalasyndaǵy qýraǵan shópterdi julyp, shashylyp jatqan qoqystardy qaptarǵa salyp, jan-jaǵyn tap-tuınaqtaı etti.
Ishki saıasat basqarmasy jastarmen jumys júrgizý jáne otbasylyq qundylyqty nasıhattaý bóliminiń basshysy Qadyrhan Arysbekovtiń aıtýynsha, aksııanyń negizgi maqsaty – tarıhı, sokraldy oryndardy tazalap, kútip ustaý bolsa, ekinshi jaǵynan olardy halyq arasynda nasıhattaý. Sonymen birge basqarma ókili tazalyq aksııasy Mádenıet jáne aqparat mınıstrliginiń tujyrymdamalyq josparynyń negizinde qolǵa alynǵanyn jetkizdi. Sondaı-aq sala mamany ekologııalyq aksııaǵa 300-ge jýyq azamattyń atsalysqanyn atap ótti. Olardyń ishinde stýdenttermen birge assambleıa uıymynyń belsendi jastary, blogerler «Jasyl el» mekemesiniń jas qyzmetkerleri, zııaly qaýym ókilderi de bar. Jaýapty ókil aksııa respýblıka boıynsha tuńǵysh ret ótkizilip otyrǵan is-shara ekenin málimdep, tazalyq senbiligi aldaǵy ýaqytta dástúrli aksııaǵa aınalatynyn aıtty.
Mádenıet, tilderdi damytý jáne arhıvter basqarmasynyń basshysy Sáken Shakeevtiń baıandaýynsha, is-sharaǵa ekovolonterler men mádenıet salasynyń maıtalmandary da úles qosty. Aksııanyń Saıram qalashyǵynan bastaý alýy da beker emes. О́ıtkeni munda atadan balaǵa mıras bolyp kele jatqan kóptegen tarıhı, mádenı eskertkishter ornalasqan. Is-sharanyń taǵy bir maqsaty – tazalyq aksııasy kezinde jastarǵa kıeli oryndardy tanystyryp, olardyń qadir-qasıetin uǵyndyrý. Ári jastardy ulttyq jádigerlerge janashyrlyqpen, qurmetpen qaraýǵa tárbıeleý. Sonymen qatar tarıhy tereńde jatqan kıeli oryndardy qalpyna keltirip, tazalaý arqyly da áýlıeli mekenge zııarat etip kelýshi týrıster qatarynyń artýyna yqpal eteri sózsiz. Negizgi mindet – ǵasyrlar qoınaýynan syr shertken kıeli nysandardy baıaǵy qalpynda saqtap, urpaqtan-urpaqqa aman-esen jetkizý. Olardyń tarıhı kelbetin burynǵy beınesinde qaldyrý úshin de tazalyq aksııalary kerek. Sol arqyly jas urpaqtyń qasıetti mekender týraly túsinik paıymy da arta túsedi. Tazalyq is-sharasy barysynda qala mádenıetine jaýapty sala basshysy jergilikti ákimdiktiń kıeli oryndardy naǵyz týrıstik nysanǵa aınaldyrýdyń joba-jospary jasalǵanyn baıandady.
«Kıeli oryndar tunyp turǵan tarıh. Ǵasyrdan ǵasyrǵa jetken bul qasıetti nysandardy kózdiń qarashyǵyndaı saqtaý – búgingi urpaqtyń mindeti. Búgingi aksııa halyqqa osy túsinikti uǵyndyratyn jaqsy bastama bolǵandyǵy sózsiz» dedi Ál-Farabı atyndaǵy qalalyq ǵylymı-ámbebap kitaphanasynyń basshysy Anar Japparqulova.
Osy kúni shaharda kıeli oryndardan bólek, barsha aýmaqta jalpyqalalyq senbilik ótti. Sonyń aıasynda árbir mekeme ujymy ózderine bekitilip berilgen aýmaqty tazalap, qoqystardan tazartty. Qyzdar sypyrǵysyn, jigitter ketpen-kúregin arqalap, súıikti qalasynyń sulý da taza bolýyna bilek sybana eńbek etti.
ShYMKENT
