Bıylǵy Devıs kýbogine Bolgarııanyń basty juldyzy, ár jyldary Ýımbldon jáne AQSh pen Aýstralııanyń ashyq birinshilikterinde jartylaı fınalǵa deıin jetip, ATR týrnırlerinde segiz ret dara shyqqan Grıgor Dımıtrov qatysqan joq. Bul jaǵdaı biz úshin qolaıly boldy. Atalǵan memlekettiń ózge oıynshylary asa myqty emes edi. Tusaýkeser básekede Tımofeı Skatov (álemniń 121 raketkasy) Dımıtar Kýzmanovpen (№178) biraz tiresti. Alǵashqy sette bolgarııalyqtyń mysy basym bolsa, qalǵan ekeýinde jerlesimizdiń asyǵy alyshysynan tústi. 2 saǵat 46 mınýtqa sozylǵan tartys 3:6, 6:4, 6:3 esebimen Skatovtyń paıdasyna sheshildi.
Kóp keshikpeı Aleksandr Býblık (№29) pen Iаnakı Mılev (№567) kortqa shyqty. Elimizdiń birinshi raketkasy álemdik reıtıngte ózinen áldeqaıda tómen turǵan qarsylasyn esh qınalmaı utty. Esep – 6:4, 6:1. Bul báseke 1 saǵat 7 mınýtta támamdaldy.
Kelesi kúni juptyq básekede Aleksandr Býblık pen Aleksandr Nedovesov Aleksandr Donskoı men Aleksandr Lazarovpen kúsh synasty. Bul oıynda bolgarııalyqtardyń baǵy jandy – 6:3, 6:3. Tótinshi kezdesýde Býblık Kýzmanovty 6:4, 7:6 esebimen qapy qaldyryp, Qazaqstan quramasyna jeńis syılady. Qorytyndy esep – 3:1.
Sondaı-aq otandyq tennısshilerimizge qatysty taǵy eki jaǵymdy jańalyǵymyz bar. Arýjan Saǵyndyqova Týnıstiń Monastır qalasynda ótken týrnırde bas júldeni oljalady. Alǵashqy aınalymdarda 18 jastaǵy Arýjan úndistandyq Smrıtı Bhasındi, danııalyq Elına Iаmshıdıdi slovakııalyq Laýra Sılekovany utsa, jartylaı fınalda lıtvalyq Andre Lýkoshıýteni súrindirdi. Sheshýshi tusta Aýrjan Úndistannyń taǵy bir ókili Vaıshnavı Adkardan aılasyn asyrdy.
Al reseılik Anna Kalınınamen jup qurǵan Qazaqstannyń ekinshi raketkasy Iýlııa Pýtınseva Japonııanyń Osaka qalasynda shymyldyǵy túrilgen halyqaralyq týrnırdiń fınalyna deıin jetti. Biraq olarǵa bas júldeni oljalaý baqyty buıyrmady. Sheshýshi tusta atalǵan tennısshiler Anna-Lena Frıdzam (Germanııa) men Nadejda Kıchenokke (Ýkraına) 6:7, 3:6 esebimen ese jiberdi. Sondaı-aq Pýtınseva jekelegen saıysta da óner kórsetip, shırek fınalda qytaılyq Van Sınıýıge jol berdi – 6:7, 7:6, 3:6.
