Jekpe-jekke shaqyrdy

Krıs Iýbenk kúni keshe 34 jasqa toldy. Onyń shyqqan tegi – ıamaıkalyq. Ulybrıtanııanyń Shyǵys Sýsseks óńirinde dúnıege kelgen Krıstiń ózimen attas ákesi de kezinde osy sport túrin serik etip, 1990-1995 jyldar ara­lyǵynda orta salmaq pen ekin­shi orta salmaqta álem chempıony atandy. Úlken sporttan qol úzgennen keıin ol ulyn boksqa mashyqtandyryp, onyń bıik belesterden kórinýine súbeli úles qosty.

Krıs Iýbenk óziniń tusaýkeser kezdesýin 2011 jyldyń qońyr kúzinde ótkizdi. Sol kezden beri 36 márte sharshy alańǵa shyǵyp, 33 ret jeńiske jetti. 24 básekede aıqyn basymdyq tanytty. Ke­zinde WBA (2015-16) nusqasy bo­ıyn­sha ýaqytsha álem chempıo­ny atanyp, IBO-nyń (2017-2018, 2019-2020) chempıondyq belbeýin ıelendi. Jekpe-jekteriniń denin Ulybrıtanııada ótkizgen Krıs Danııa, Germanııa, Saýd Arabııasy jáne AQSh-qa bir-bir retten sapar shekti. Ár jyldary ol Dmıtrıı Chýdınov, Gerı O’Sallıvan, Tom Dıýran, Artýr Abraham, Djeıms Dıgeıl, Matveı Korobov, Vanık Avdııan syndy sańlaqtardy sabady.

Iýbenk óziniń 19-kezdesýinde alǵash ret jeńilistiń kermek dámin tatty. 2014 jyldyń 29 qarashasynda Londonda ol Bıllı Djo Sonderske ese jiberdi. 2018 jyldyń 17 aqpanynda Manchester qalasynda Djordj Groývzdan utyldy. Eki retinde de sheshimdi tóreshiler shyǵardy. Byltyr 31 qańtarda «Manchester Arenada» Lıam Smıtten tórtinshi raýndta tehnıkalyq nokaýtpen jeńildi. Bul boksshylardyń barlyǵy da  Ulybrıtanııadan. Arada jeti aıdan asa ýaqyt ótken soń qos sańlaq dál sol arenada qaı­ta qol­ǵap túıistirdi. Bul joly Iýbenk Smıtti 10-raýndta sula­typ saldy.

Al Gennadıı Golovkınniń júrip ótken joly jankúıerlerdiń kóz aldynda. Kásipqoı boksty serik etken 17 jyl ýaqyt aralyǵynda ol kóptegen bıik belesterdi ba­ǵyndyryp, chempıondyq tájdiń talaıyn ıelendi. 45 jekpe-jektiń 42-sinde jeńis toıyn toılady. 37 qarsylasyn nokaýtpen utty. GGG tek Meksıkanyń mar­qasqasy Saýl Alvaresten eki ret utylyp, bir márte teń tústi. Genanyń sońǵy ret rıngke shyqqanyna týra bir jyl boldy. Soǵan qaraǵanda dańq­ty otandasymyz bylǵary qol­ǵabyn shegege ilýge qamdanyp júrgen sekildi.

Kóbine-kóp Germanııa men AQSh-ta judyryqtasqan GGG Qazaqstanda bir ret qana óner kór­setti. Sonaý 2010 jyldyń 16 jel­toqsanynda ol Astanadaǵy «Dáý­let» sport kesheninde kolým­bııalyq Nılson Hýlıo Tapııany úshinshi raýndta uryp jyǵyp, jergilikti jankúıerlerdi bir qýant­qan edi. Endi óziniń sońǵy jekpe-jegin Gennadıı Golovkın qaıtadan óz elimizde ótkizse degen tilegimiz bar.