Foto: uww.org
«Rızabek, sen Qazaq elin aıtýly jeńisimen rıza ettiń. Kúlli halqyń qýanyp jatyr. Aldaǵy jarystarda da sáttilik tileımin. Erkin kúresten álem chempıonatynyń altyn medali bizge Qazaq KSR kezinde de, táýelsizdigimizdi alǵan 32 jyldyń ishinde de buıyrmaı júr edi. Týrızm jáne sport mınıstrligin, Ulttyq Olımpıada komıtetin, barsha qazaq halqyn aıtýly jeńispen quttyqtaımyn», dedi D.Turlyhanov.
Erkin kúresten elimizdiń balýandary álem chempıonatynyń fınalyna alǵash ret 1995 jyly shyqty. AQSh-ta ótken álem chempıonatynyń fınalynda 82 kelide kúresken Elmadı Jabraılov amerıkalyq Kevın Djonsonǵa 0:1 esebimen ese jiberip, kúmis medaldi mise tutty.
2016 jyly 70 kelide kúresken Nurlan Bekjanov Vengrııada ótken álem chempıonatynyń fınaldyq aıqasynda reseılik Magomed Kýrbanalıevten 4:8 esebimen utyldy.
2018 jyly da álem chempıonaty Majarstannyń bas qalasy Býdapeshtte ótti. 57 keli salmaqta synǵa túsken Nurıslam Sanaev fınaldyq beldesýde reseılik Zaýr Ýgýevke 3:4 nátıjesimen jol berdi.
2019 jyly kúres túrlerinen álem chempıonaty Astana qalasynda túńligin túrdi. Osy álemdik dodada erkin kúresten eki birdeı balýanymyz fınalǵa jetti. 65 kelide Dáýlet Nııazbekov Reseı balýany Gadjımýrad Rashıdovtan 0:11 upaıymen jeńildi. 70 kelide kúresken Nurqoja Qaıpanov ta reseılik Davıd Baevtan 2:14 esebimen jeńildi.
Mine, erkin kúresten 32 jyl boıy ketip júrgen esemizdi kúni keshe Rızabek Aıtmuhan bútindep berdi.
