Bul sýret ult-azattyq qozǵalystyń 20 jyldyǵyna oraı 1936 jyly latyn grafıkasymen jaryq kórgen «Amankeldi Imanov» atty shaǵyn jınaqta jarııalanypty. Kitaptyń avtory – S.Braının, jaýapty redaktory – Ýtemısov delinipti.
Shyndyǵynda, bul kitap áýeli «Amangeldy Imanov» degen atpen orys tilinde «Kazkraıogız» baspasynan jaryq kórip, jedel túrde qazaqshaǵa aýdarylǵan kórinedi. О́ıtkeni kitap avtory Solomon Haımovıch Braının – oryssha jazatyn adam. Bul kisini qazirgi alashtanýshylar 1935 jyly jaryq kórgen (Sh.Shafıramen birigip jazǵan) «Ocherkı po ıstorıı Alashordy» atty eńbegi arqyly biledi.
Bul sýretti Ábilhan Qasteev qalaı saldy degenge toqtalsaq, keńes bıliginiń alǵashqy jyldary KSRO basshysy I.Stalın arnaıy tapsyrma berip halyqty patrıottyq rýhqa tárbıeleıtin qaharmandar tizimin jasatqan. Bul tizimde qazaq halqy atynan Amangeldi Imanov bolǵan. Osy tulǵalardy dáripteý buqaralyq sıpat alǵan. Sóıtip, halyq batyry Amangeldiniń portretin jasaý jas sýretshi Ábilhan Qasteevke júkteledi. Sýretshi jumysty oıdaǵydaı atqaryp shyǵý úshin kóp izdenedi.
Á.Qasteev 1936 jyly salǵan alǵashqy sýretten bastap batyrdyń beınesin 1950 jylǵa deıin árqıly keıipte tórt dúrkin salyp shyǵady. Sýretshi 1960 jyly jaryq kórgen «Bilim jáne eńbek» jýrnalyndaǵy maqalasynda: «Men batyrdyń beınesin izdegende eki túrli tarıhı materıaldarǵa súıendim. Onyń birinshisi – dokýmenttik (arhıvtik) materıaldar. Onda Amangeldiniń sýretteri bolmaǵanymen, ózi qurǵan otrıady, júrgizgen jumystary týraly derekter jazylǵan. Sondaı derekter jumysymdy tolyq túsinip alýǵa qajet boldy. Ekinshisi – batyr týraly halyq aýzyndaǵy ańyz-áńgimeler. Olar Amangeldige baılanysty oqıǵalardy, onyń túr-sıpatyn, kelbetin, is-áreketin, minez-qulqyn qolmen qoıǵandaı etip aıtatyn. Osyndaı materıaldardy mol zertteı kelip, durys túıindegende izdegen beıneń oıdaǵydaı shyǵatynyn baıqadym», dep jazypty.
