«Qazaqstan Eýrazııalyq ekonomıkalyq odaq aıasyndaǵy yntymaqtastyqty odan ári damytýǵa nıetti. Bul Odaq óte perspektıvti ıntegrasııalyq uıym dep sanaımyz. Odaqtyń ekonomıkalyq áleýetiniń múmkindikteri zor. Qazaqstan EAEO-ǵa múshe memleketterdiń bári osy jerde 2015 jyly qol qoıylǵan shartty qatań saqtap, tek ekonomıkalyq ıntegrasııa, saýda-sattyqty damytý, ózara taýar almasý baǵytynda ǵana elderimizdiń naryǵyn ashý máselelerimen aınalysýǵa tıis», dedi Qasym-Jomart Toqaev.
Memleket basshysy saýda-ekonomıkalyq kooperasııanyń tıimdiligi kólik-tranzıt áleýetin ashýmen tikeleı baılanysty, sondyqtan kólik qatynastarynyń múmkindikterin dáıekti túrde damytý kerek dep sanaıdy.
Prezıdent Iranǵa, Parsy shyǵanaǵyna jáne Úndistanǵa shyǵýǵa múmkindik beretin Soltústik – Ońtústik tranzıt dáliziniń, Qazaqstan – Túrikmenstan – Iran temirjolynyń, Batys Eýropa – Batys Qytaı baǵytynyń múmkindikteri jóninde aıtty. Sonymen qatar Transkaspıı halyqaralyq kólik dáliziniń áleýetine basa mán berdi.
Kezdesý barysynda Memleket basshysy Eýrazııalyq ekonomıkalyq odaqqa múshe elderdiń ónerkásip salasyndaǵy yqpaldastyǵyn damytý mańyzdy ekenine toqtaldy.
Sondaı-aq bıyl mamyr aıynda ótken Joǵary Eýrazııalyq ekonomıkalyq keńes otyrysynda ónerkásip jobalaryn júzege asyrý kezinde kooperasııaǵa qarjylaı kómek kórsetý týraly qujatqa qol qoıylǵanyn eske saldy. Prezıdenttiń aıtýynsha, bul mehanızm birlesken jańa óndiris oryndaryn ashýǵa tyń serpin beredi.
Kezdesý sońynda Qasym-Jomart Toqaev kórmeni uıymdastyrýǵa belsendi atsalysqany úshin úkimetter basshylaryna alǵys aıtty. Sondaı-aq olardyń jumysyna tabys, al elderdiń ıgiligine qyzmet etetin jańa birlesken jobalardyń kóbeıýine tilektestik bildirdi.
