Áýlettiń búkil jıyntyq ótili 616 jyldy quraıdy eken. Atalǵan jıyntyq eńbek ótili Eńbek kitapshalarymen rastalǵan. Túkibaevtar otbasy besinshi býynda da óziniń qıyn kásibine tabandylyq tanytyp, aınymaǵan. Úlkenderi bilimderi men tájirıbelerin áýlettiń jas temirjolshylaryna berip otyrǵan. Ár jyldary temirjolda Túkibaevtar otbasynyń 35 ókili jumys istegen.
Atalǵan áýlet «Eńbek joly» respýblıkalyq baıqaýynyń «Úzdik eńbek áýleti» nomınasııasy boıynsha jeńimpaz atanyp otyrǵan.
Áýlet negizin qalaýshylar – aǵaıyndy Maýken, Ilııas, Sydyq úsheýi temirjoldaǵy eńbek jolyn sonaý 30-ynshy jyldary bastap, Túrkistan–Sibir temirjolynyń qurylysyna qatysqan eken.
Maýken Túkibaev poıyz kondýktory, sodan keıin stansııa boıynsha kezekshi bolǵan. Ekinshi dúnıejúzilik soǵys jyldarynda stansııa bastyǵy bolyp jumys istep, áskerı oq-dáriler men azyq-túlikterdi maıdanǵa úzdiksiz ári qaýipsiz jetkizý jumystaryn qamtamasyz etýge úles qosqan. Onyń aǵalary Ilııas pen Sydyq Túkibaevtar jol dıstansııasynda jumys atqarǵan.
Ákeleriniń eren eńbegin balalary Malıkrııan Maýkenuly, Serikqan Ilııasuly, Ǵalı Sydyquly, Zulkumar Sydyquly abyroımen jalǵastyrǵan. Osy kúnderi temir jolda Túkibaevtar áýletiniń negizin qalaýshylardyń nemereleri men shóbereleri jumys istep júr.
