Kollajdy jasaǵan Qonysbaı ShEJIMBAI, «EQ»
Teginde alpys eki tamyryna án qonǵan áýletter bolady. Olar qaı kezde de sapaly mýzykamen jurttyń júregin jaýlaýǵa tyrysatyny belgili. Áýelde basqasha bir ataýmen qurylǵan, keıin «Jebe» dep atalǵan toptyń ishinde bastapqyda ónerimen órge umtylǵan Erik jáne Danııar Jaqsylyqov degen jigitterdiń ákesi de mýzykant edi.
Bir sózben aıtqanda án men kúıdiń yrǵaǵyna terbetilip ósken jas býynnyń qataryna Izbasar Kópbergenov degen ánshi jigit jáne basqalary qosylyp (keıin toptaǵy ánshiler jıi aýysyp jatty), birneshe tamasha shyǵarmany tyńdarmanǵa usynǵan kezde «ABK»-dan bastalyp, «MýzArt», «Jigitter», «Orda» sekildi estradalyq toptarmen jalǵasqan qazaq estradasy jańa bir boızbendpen tolyqty dep topshylaǵanbyz...
Sol «Jebe» tobynyń boıtumaryna aınalǵan «Izdeseń meni» áni sazymen de, sózimen de kóńilge qonǵan. Baıandaý stılindegi mátinmen kómkerilgen ánniń óńdelýi de júrekke jyly tıetin. Kólikte otyryp ta, úıde júrip te osy bir lırıkalyq ánniń áýenine tóńkerilgender az emes ekeni daýsyz. Kóńildegi áldebir qupııa sezimderdi qozǵap jiberetindeı áseri de barshylyq. Qalaı desek te ádemi shyǵarma áli kúnge deıin ólgen joq. О́ıtkeni azshylyqtyń bolsa da júreginen oryn alǵany aqıqat.
«Izdeseń meni kúzde sen,
Qasyńda seniń júrmesem.
Taldardan túsip ózińmen,
Japyraq bolyp júzdesem»,
dep bastalatyn án shýmaqtary estradalyq janr úshin sátti shyqqan teńeýlerimen de kisi janyn baýrap alatyn.
On bes jylǵa jeteqabyl ýaqyt buryn jazylǵan ádemi ánniń yrǵaǵy janǵa jaqyn bolǵanymen, ol kezde tegin jarnamanyń tóresine aınalǵan áleýmettik jeliniń dáýreni júrip turǵan joq edi. Sonyń da áseri bar shyǵar, áıteýir álgi ıýtýb degendi ashyp, ánge túsirilgen beınebaıan astyna kóz salsań, «Jebeniń» tólqujatyna aınalǵan shyǵarma tyńdarman júregine belgili bir deńgeıde jete qoımaǵanyn aıqyn túsinesiń. Ýaqyt-aı deseńizshi. Erte kelgen kóktem sekildi bul án de ýaqytynan erte jaryq kóripti.
«Men joqta janym gúldeme,
Sezimniń otyn úrleme.
Aspanda turmyn aı bolyp,
Izdeseń meni kúnde de,
Izdeseń meni túnde de.
Qara bult kókten ótkende,
Aq nóser bolyp sepkende.
Ár tamshy jaýyn ol menmin,
Izdeseń meni kóktemde.
Janyńda jazda júrmesem,
Besigin oıdyń terbesem.
Qoryqpa sáýlem ol menmin,
Samal jel bolyp úrlesem»,
dep túıindeletin ánniń qaıyrmasy da tyńdarmandy beıjaı qaldyrmaıtyny anyq.
Ádette lırıkalyq poezııa adam tabıǵatyndaǵy ishki álemniń kózge kórinbeıtin qubylystaryn peızaj beınesinde qulpyrta túsetin qudiretke de ıe. Ánde tirshilik pen tabıǵat baılanysyn adamı sezimge tán úılesimmen sabaqtastyra túsetin element kezdeskenimen, avtordy sonshalyqty sheber deı almaıtynyń da anyq. Alaıda mýzykanyń jandy tebirenter qýaty men toptaǵy túrli daýystaǵy oryndaýshylardyń sheberligi sezim pernesin dóp basady. Boıyńdy jaýlap, oıyńdy san tarapqa júgirtedi. Rahat kúı keshesiń. Áıteýir bir qımastyqqa toly mahabbat seziminiń shyrpysyn tutatyp-aq turady.
«Jebe» toby qazaq estradasynyń bosaǵasyn alqynyp-julqynyp attaǵan joq. Baıaý keldi me, jaıaý keldi me, ol jaǵy ózderine ǵana málim. Bir anyǵy – estrada tórinen oıyp turyp oryn alýǵa bekingen bolatyn. Esti tyńdarmanǵa sapaly dúnıe usynýǵa tyrysty. Alaıda ol mıssııasyn oryndaı almaǵandaı kórinedi.
Shyny kerek, estrada janryna qadam basqan shyǵarmashylyq ujymdardyń basym kópshiligi, «jarqyrap kóringen «MýzArt» pen «Jigitterdiń» izin basamyz» degen ambısııanyń jeteginde júretini belgili. Alaıda armandary oryndalmaǵan kúıi kózden ǵaıyp bolyp jatady. Shydam jetpeı me, izdenis tapshy ma? Álde bizge beımálim basqa da bir sebep bar ma? Ol jaǵyn kim bilsin.
Zymyrandaı zýlaǵan ýaqyt ólshemine salsaq, «Izdeseń meni» áni jaryqqa shyqqaly da talaı jyldyń júzi bolypty. Odan keıin «Jebe» toby da jarqyrap kórine almady. Estradalyq án álbette, azshylyqqa arnalǵan klassıka emes. Sátti shyqqan shyǵarmalardyń juldyzy jarqyrap shyǵa keledi. Bálkim «Jebe» izdenistiń jańa bir izine túskende búgin de tamasha týyndylarymen el nazarynan túspes pe edi, kim bilsin!
Bir anyǵy, «Izdeseń meni» áni áli kúnge deıin tyńdarman kóńilinen óshken joq. Múmkin talantty jigitterden quralǵan top sol bir lırıkalyq ánimen-aq ónersúıer qaýymnyń júreginde qalǵan bolar.
