«Bulaq basynan tunady» demekshi, ansambl jetekshisi, otaǵasy Talǵat Sembaevtyń eren eńbeginiń, tynymsyz izdenisiniń arqasynda otbasylyq ansambldiń án qorjyny jyldan-jylǵa túrlenip, shyrqata salǵan ásem ánderi júrekterden jyly oryn alýda. Osy ýaqyt aralyǵynda túrli deńgeıdegi baıqaýlarda baǵyn synap, júldeli oryndardan kóringen jetistikterin saýsaqpen sanamalap taýysa almasymyz anyq. Eńbek elenip, mereı tasytqan túrli dárejedegi dıplomdar men Alǵyshattar, Qurmet gramotalary eleýli jyldardyń jemisi der edik.
Mysalǵa aıtsaq, 2010 jyly Almaty oblystyq «Otbasy – altyn dińgek» baıqaýynda bas júldeni jeńip alyp, respýblıka boıynsha ótken baıqaýda 16 otbasynyń ishinen 2-oryndy ıelengen edi. Sodan beri óńirdiń barlyq aýdanyna saparlap, konserttik baǵdarlamalaryn usynǵan Sembaevtar ansambli ánsúıer qaýymnyń alǵysyna bólendi. О́nerdegi óristeri keńip, repertýarlary halyqtyq mol muralarmen tolyqty. Nátıjesinde «halyqtyq» ansambl atandy.
Ansambl jetekshisi ári kompozıtor T.Sembaevtyń ónerge qosqan ólsheýsiz eńbegi eskerilip, ótken jyly «Mádenıet salasynyń úzdigi» tósbelgisimen marapattaldy. Otbasylyq óner ujymynyń oryndaýyndaǵy otyzdan asa án – T.Sembaevtyń tól týyndysy. Mýzykalyq aspaptarda óńdelmegen ózge de ánderin qosqanda, osy kúnge deıingi shyǵarmasynyń jalpy sany alpystan asady. Onyń ishinde patrıottyq taqyrypqa arnalǵan týyndylary bir tóbe. Ánderiniń deni týǵan jer, salt-dástúr, ana men áke, bala, súıgen jar, ustaz, kóktem syndy lırıkalyq shyǵarmalarǵa negizdelip, ár kez tyńdaýshylaryn baýrap alady. Aýdanda ótetin dástúrli merekelik sharalarda sazgerdiń «Kel, Naýryz», «Astana», «Almatym», «Jańa jyl» sııaqty ánderi shyrqalyp, ultymyzdyń rýhyn aspandatady. Sondaı-aq aqyn Esenqul Jaqypbektiń «Kúz qala Taldyqorǵan», Núsipbaı Ábdirahymnyń «Qımas meken Jetisý», «Úmbetáli – jyrdyń qara jorǵasy», Ámire Árinniń «Qaratalym, saǵynyshym, aýylym», Qýat Qaıranbaıdyń «Jetisý», Baıqaly Núketaevtyń «Táýelsizdik bastaýy», Samat Nábıevtiń «Taldyqorǵan» sııaqty óleńderine jazǵan ánderi mádenı sharalarda únemi oryndalyp, taqyryptyń mán-mazmunyn arttyrýda. Kompozıtordyń ánderin tanymal estrada juldyzdary da oryndaıdy.
О́nerpaz áýlettiń tiregine aınalǵan Talǵat Sháripuly «Jetisý» memlekettik ýnıversıtetin támamdap, Sarqan mádenı-aǵartý ýchılıshesinde mýzyka bóliminiń ustazy, úrmeli aspaptar orkestriniń dırıjeri, Almaty qalasyndaǵy respýblıkalyq bilim jetildirý ınstıtýtynda estetıkalyq bólimniń ádiskeri qyzmetterin atqarǵan. Qasıetti Jambyl aýdanyna qonys aýdarǵan alǵashqy jyldardan bastap, áýezdi án jazý daryny ashyla bastaǵan. Qarǵaly aýylyndaǵy mektepte mýzyka páninen sabaq berip, jas jetkinshekterdi ónerge baýlyp júrgende tyrnaqaldy «Qarǵaly» áni týady. Sodan bastap án tıegi aǵytylyp, jergilikti qalamgerler Rátbek Terlikbaev, Gúlnár О́mirzaqova, Vıktor Nıkıtınderdiń sózderine jazylǵan ánderi Alataý aspanynda qalyqtap, konsertterde úzdiksiz oryndalyp keledi.
Otaǵasynyń ómirlik qosaǵy, aıaýly jary Kúlimhan Qalalıeva da – ánshi ári birneshe ánniń sózin jazǵan daryn ıesi. О́nerli otbasy qorjynyndaǵy jetpiske jýyq ánniń jıyrmadan astamynyń óleńin jazǵan osy Kúlimhan Qalalıeva. Kompozıtordyń joǵaryda aıtqan «Qarǵaly» ániniń sózin jazǵan da – jary. T.Sembaev bul áni úshin Muqan Tólebaev atyndaǵy dástúrli oblystyq kompozıtorlar baıqaýynda 36 sazgerdiń ishinde «Jetisýym – jeruıyǵym» atalymy boıynsha 3-oryn alǵan.
Kerbulaq aýdanynda dúnıege kelgen Kúlimhan Tursynqyzynyń «Týǵan jerim – Basshıim», «Ustazym», «Sen», «Altyn uıa mektebim», basqa da ánderi keń taralǵan. Jastaıynan ónerdi ómirine serik etken ulaǵatty ustazdyń mamandyǵy – qobyzshy, dombyrashy. Osy kúni ol – Uzynaǵash aýylyndaǵy «Aıgólek» bóbekjaıynyń mýzyka jetekshisi. Buǵan qosa Sarybastaý orta mektebinde mýzyka páninen sabaq beredi.
«Men bala kúnimnen óte belsendi boldym, qolyma dombyra alyp aıtysqa da qatystym, nebir júıriktermen qyz qýýǵa da shabatynmyn. Dalanyń erkesi bolyp óse kele, án men jyrǵa áýestendim. Basshı aýylynda kitaphanashy, klýbta ádisker retinde mádenı is-sharalardyń bel ortasynda júrdim. О́nerdi qulaı súıdim, án-kúı dese ishken asymdy jerge qoıatynmyn. Sonyń arqasynda jıyrma jylǵa jýyqtapty, otbasymyzben el aldynda ónerimizdi kórsetip kelemiz», deıdi.
О́mirde de, óner aıdynynda da qos aqqýdaı qatar júzgen jarasymdy juptyń balalary da shetinen ózderine tartqan ónerli. Tula boıy tuńǵyshy Janel aýdandyq «О́ner» mektebinde ustazdyq etse, uly Ánýar – aýdandyq «Súıinbaı sazy» folklorlyq-etnografııalyq ansambliniń beldi ánshisi. О́nerli otbasynyń kúıeý balasy, ıaǵnı Janeldiń serigi Erseıit Boranbaev ta – osy ansambldiń konsert júrgizýshisi ári ánshisi. Sembaevtar otbasynyń kelini Jadyra Amanqosqyzy bolsa, myń buralǵan bıshi. Al kenjesi Taýlan Talǵatuly da – otbasylyq ansambldiń múshesi. Búginde óz aldyna óner mektebin ashyp, jas býyndy baýlýda.
Áýletin ánmen terbegen T.Sembaev ótken jyly 60 jasqa tolýyna oraı Jambyl aýdanynyń Qurmetti azamaty atandy. Osylaısha, ónerdiń jaryq juldyzyna aınalǵan Sembaevtar otbasylyq halyqtyq ansambliniń keleshegi kemeldenip keledi.
Almaty oblysy
