Nysana kózdeıtinderge qamqorlyq kerek
Bul kúni altynnyń aýyly qaı jerde ekenin túsingen jýrnalısterdiń basym bóligi «Fuyang Yinhu» sport ortalyǵyna jınaldy. Atalǵan jerde álem chempıony Zýhra Irnazarova, onyń komandalastary, aralas jupta álem birinshiligi men Álem kýboginde júlde alyp júrgen Edýard Eshenko men Ásem Orynbaı synǵa tústi.
Aldymen tapanshamen 10 metrge jyljymaly nysanany kózdeýde Zýhra Irnazarova qarsylastarynyń myqtylyǵyna qaramastan, jarysty óte senimdi bastady. Nátıjesinde, soltústikkoreıalyq qos sportshydan oq boıy ozyp, Azııa oıyndarynyń ekinshi altynyn Qazaqstan qorjynyna saldy. Al bul jarysta baq synaǵan otandastarymyz Fatıma Irnazarova 6-oryndy ıelense, Aleksandra Sádýaqasova 7-orynǵa jaıǵasty.
Dál osy jyljymaly nysana kózdeýden toptyq jarysta ápkeli-sińlili Zýhra men Fatıma Irnazarovalar jáne Aleksandra Sádýaqasova bastaǵan Qazaqstan qyzdar quramasy kúmis júldeni enshiledi (Zýhra Irnazarovamen bolǵan suhbatymyzdy kelesi nómirde jarııalaımyz. – Avtor).
Sonymen qatar beısenbi kúni stend atýda (Skid-mih) Edýard Eshenko men Ásem Orynbaı Qazaqstan qorjynyna úshinshi altyn medal qosty. Atalǵan básekede alǵashynda 8 qurama baq synady. Onda jerlesterimiz birinshi orynmen irikteýden súrinbeı ótti. Ekinshi kezeńde 6 qurama fınaldyq joldamany sarapqa saldy. Bul synda otandastarymyz ekinshi orynǵa turaqtap, altyn medal alý múmkindigine ıe boldy. Al sheshýshi kezeńde Kýveıt mergenderimen ózara jeńimpazdy anyqtaýǵa kiristi. Eki quramaǵa da altyn aýadaı qajet edi. Sebebi kýveıttikterdiń qorjynynda buǵan deıin 1 altyn, 1 qola medal bolsa, al bizde 2 altyn, 3 kúmis jáne 13 qola bar-tuǵyn. Namysqa tyrysqan jerlesterimiz bas-aıaǵy jarty saǵattyń ishinde qarsylastarynan 5 upaıǵa asyp, Azıadanyń chempıony atandy.
Osy jeńisten keıin arnaıy suhbat bergen Ásem Orynbaı bul jeńisti kesheden beri ýaıymdap júrgen ata-anasyna arnaıtynyn jetkizdi.
«Bizdiń komandamyz álemde myqty sanalady. Sebebi osyǵan deıin álem kýbogi kezeńderinde top jaryp, álem chempıonatynda qola júlde jeńip alǵanbyz. Edýard ekeýmiz bir-birimizdi sózsiz túsinemiz. Almaty oblysynda birge jattyǵamyz. Fınal ońaı bolǵan joq. Kýveıttik qarsylastarymyz óte myqty, Olımpıada júldegerleri», dedi Ásem.
Sondaı-aq sportshy Hanchjoýdaǵy aýa raıynyń atý barysyna qalaı áser etkenine toqtaldy.
«Búgingideı samal jel atýǵa esh áserin tıgizbeıdi. Qatty jel turyp, jańbyr jaýsa, qınalatynymyz anyq. Mundaǵy ystyq ári ylǵaldy klımat maǵan kádimgideı áser etti. Qatty terledim. Dese de, bári sátti aıaqtaldy. Qarsylastarymyz ekinshi aınalymda qateni kóp jiberdi. Sodan-aq altyn júlde qol sozym jerde ekenin túsindim», deıdi ol.
Shyny kerek, 1900 jyly paıda bolǵan stend atý Qazaqstanda kenje damyǵanyn ańǵarý qıyn emes. Qazaqtar ádette balasyn fýtbol, kúres, boks sekildi sport túrlerine berip jatady. Ol da jón. Alaıda nysana kózdeý sportynda bir emes, birneshe medal jeńip alý múmkindigi bar. Osy Azııa oıyndarynda 20 medal jıyntyǵy sarapqa salynyp jatyr. Bul degenińiz – jeńil atletıkadan keıingi eń kóp medal úlestiretin sport túri. Onyń ústine, munda jasqa qaramaıdy. Budan buryn jazǵanymyzdaı, Olga Panarına 53 jasynda Azııa oıyndarynyń chempıony atanyp otyr. Kúmis júldeger atanǵan kýveıttik sportshynyń jasy 60-ta. Sondyqtan da osy sport túrin Qazaqstandaǵy ár qalada damytý kerek degen oı keldi. Áıtpese, quramada Ásem Orynbaıdan basqa birde-bir qazaq sportshysy joq.
Altyn – arman, qola – qolda
Bul kúni oıyndarda altynnan úmitker sportshylar tek qola medalmen ǵana shekteldi. Qola júldeni jeńip alǵandardyń qatarynda semserlesýge qatysqan otandyq sportshylar da bar.
Bul sport túrinen erler komandasy jartylaı fınalda Azııa chempıondary Ońtústik Koreıa quramasyna ese jiberdi. Kezdesý 41:45 esebimen aıaqtaldy. Semserlesýden el namysyn Muhamedálı Rahmanalı, Sattarhan Nazarbaı, Artem Sarkısıan men Janat Nábıev qorǵady. Irikteý kezeńinde otandyq sportshylar Nepal quramasy (45:15) men Kýveıt komandasyn (45:43) jeńgen edi.
Jaǵajaı voleıbolynan el namysyn qorǵaǵan sportshylar Sergeı Bogatý men Dmıtrıı Iаkolev Azııa oıyndarynyń qola júldesin jeńip aldy. Aralas juptyq saıysta sportshylarymyz ırandyq qarsylastaryn jeńdi. Kezdesý 2:0 esebimen aıaqtaldy.
Altynnan basty úmitkerlerdiń biri – taekvondoshylarymyz osy kúni qola medaldy qanaǵat tutty. Erler arasynda 80 kg-dan joǵary salmaq dárejesinde synǵa túsken Smaıyl Dúısebaı alǵashqy kezdesýinde Býtan eliniń sportshysynan basym tússe, shırek fınalda pákistandyq sportshyny jeńdi – 2:0 (6:5, 9:3). Al jartylaı fınalda ońtústikkoreıalyq Jaohıang Songke 0:2 esebimen jol berdi.
67 kg salmaqta Denız Jansel Azııa oıyndarynda eki jekpe-jek ótkizip, qola júldeger atandy. Aldymen ol lıvandyq taekvondoshyny 2:0 (6:3, 7:0) esebimen utsa, jartylaı fınalda ońtústikkoreıalyq sportshyǵa shamasy jetpedi – 1:2.
«Josparym oryndaldy deı almaımyn. Babymda boldym, altyn alamyn dep kelip edim. Endi amal joq, Parıj Olımpıadasyna joldama jeńip alýymyz kerek. Soǵan jumys isteımiz», dedi Denız.
Eske sala keteıik, Jansel Denız 2018 jyly Indonezııada ótken Azııa oıyndarynyń kúmis júldegeri atanǵan.
Buǵan deıin sporttyq gımnastıkadan álem kýbogi kezeńderiniń jeńimpazy bolǵan Narıman Qurbanov Hanchjoýda nebári úshinshi oryn ıelendi. At ústindegi jattyǵýlar fınalynda qazaqstandyq 15,100 upaı ǵana jınaı aldy. Altyn medaldy qytaılyq Taıpeıden kelgen Lı Chı Kaı (15,500) alsa, ekinshi oryndy japonııalyq Rıota Sýmýra (15,166) ıemdendi.
Ádilbek Mýsın júzýden ekinshi medalin jeńip aldy. Azııa oıyndarynda 50 metrge batterflıaı ádisimen júzgen jerlesimiz Ońtústik Koreıa men Sıngapýr sportshylarynan qalyp qoıdy. Buǵan deıin ol osy ádispen 100 metrge júzýde úzdik úshtikke engen bolatyn.
Sáken & Hasanbaı – 1:2
Keshegi keshte boksshylar úshin óte aýyr kún boldy desek, qate aıtpaǵan bolar edik.
Áıelder arasynda 60 kıloǵa deıingi salmaqta synǵa túsken Rımma Volosenko alǵashqy jekpe-jekte taıpeılik qarsylasy Vý Shıgýıǵa ese jiberdi. Tartysty ótken kezdesýde tóreshi bizdiń boksshyǵa eki, qarsylasqa bir eskertý jasady. Sol eskertýdiń saldarynan jerlesimiz tóreshilerdiń basym daýysymen qarsylasyna jol berdi.
Keshki baǵdarlamada Azııa oıyndarynda kópshilik kútken Sáken Bıbosynov pen ózbekstandyq Hasanbaı Dýsmatov jekpe-jegi ótti.
Á degennen-aq boksshylar bir-birin ańdysyp jatpady. Birneshe serııalyq soqqy jasaldy. Qulady, shalyndy, súrindi. Barlyǵy boldy. Biraq, bizdiń oıymyzsha, birinshi raýndta ózbek boksshysyna nokdaýn ashylý kerek edi, oǵan tóreshi kóz juma qarady. Sondaı-aq birinshi raýnd aıaqtalǵanda, barlyq tóreshi biraýyzdan ózbek boksshysyna jeńisti bergende, biz ǵana emes, qasymyzda otyrǵan ózge eldiń jýrnalısteri de tańdanysyn jasyra almady.
Ekinshi, úshinshi raýndta eki boksshy da soqqy almasyp jatty. Oıymyzsha, Sáken jeńilmedi. Biraq tóreshilerdiń oıy basqa boldy. Buǵan deıin eki boksshy bir-birimen kezdesken edi. Jalpy esep ázirge 2:1, ózbek boksshysynyń paıdasynda.
«О́kinishke qaraı, ekinshi kezdesýimde jeńilip qaldym. Azııa oıyndarynda altyn alyp, maqsatyma jetsem dep edim. Qatelik ózimnen boldy. Negizi, jaqsy judyryqtasyp edim. Biraq birinshi raýndta tóreshilerdiń barlyǵy qarsylasqa upaı bergenin kórgen soń, taktıkany durys oryndaı almadym. Jospardyń bári ózgerip ketti. Endi jarys jolynda qalǵan boksshylardyń bárine sáttilik tileımin. Ánuranymyzdy oınatyp, baıraǵymyzdy kóterip, lısenzııany kóbirek alsyn», dedi S.Bıbosynov.
71 kg salmaqta sensasııa oryn ala jazdady. Álem chempıony Aslanbek Shymbergenov óte qıyn kezdesýde jergilikti qytaılyq sportshyny utty. Osy oraıda boksshynyń jeke bapkeri Ermek Ertaev kezdesýdi qorytyndylap, mán-jaıdy túsindirip berdi.
«Jekpe-jek óte aýyr ótti. Tóreshi eki-úsh ret nokdaýn bolatyn sátti esepke salmady. Bul endi – Azııa oıyndary. Ońaı bolmaıdy. Ekinshi raýndty qarsylasqa 3:2 esebimen berdi. Aslanbek ózin qolǵa alyp, jeńisti julyp aldy. Aslanbektiń bul qarsylasyn bilmeımiz. Ol álem chempıonatyna da, basqa jarystarǵa da qatyspaǵan. Azııa oıyndarynda alǵash ret kórip otyrmyz. Endigi qarsylas – ózbek boksshysy. 67 kg-da álem chempıony atanyp, 71 kg-ǵa aýysqan. Barlyǵyn sharshy alań kórsetedi», dedi Aslanbektiń bapkeri Ermek Ertaev.
Sonymen, sportshylarymyz jarystyń besinshi kúninde toǵyz medal enshilep, beıresmı komandalyq esepte quramamyzdy úzdik ondyqqa jaqyndatty. Búgin jarys jolyna altyn alady-aý degen sportshylarymyz shyǵady.
