Gúlnapıs Orynbasarqyzynyń ómirden ozǵanyna qyryq kún bolyp qalypty. Kúni keshe ǵana ortamyzda júrgendeı edi. Ol kisiniń eren eńbegin aıtyp taýysa almaspyz. Qamshynyń sabyndaı qysqa ǵumyrynda adamzat balasyna, ǵylym salasyna sińirgen ıgilikti eńbegi jeterlik. Elimizdiń áleýmettaný ǵylymynyń damýyna, ózindik ǵylymı mektepterdiń qalyptasýyna, ǵalym-shákirtterge tálimgerlik etip, olardyń kásibı jetilýine qosqan úlesi erekshe.
Gúlnapıs Orynbasarqyzy 1966 jyly Qyzylorda oblysynda dúnıege kelgen. 1985-1990 jyldary M.V.Lomonosov atyndaǵy Máskeý memlekettik ýnıversıtetin fılosofııa mamandyǵy boıynsha bitirgen. 90-jyldardaǵy eleýli de mańyzdy áleýmettik ózgeristerdi bastan ótkergen qıyn kezeńde oqý-aǵartýshylyq qyzmetin bastap, 1993-1996 jyldary Ál-Farabı atyndaǵy Qazaq ulttyq ýnıversıtetiniń aspırantýrasynda oqyǵan. 1997 jyly «Tulǵanyń saıası áleýmettenýi máselesin áleýmettanýlyq taldaý» taqyrybynda kandıdattyq dıssertasııasyn qorǵasa, 2008 jyly «Qazaqstan qoǵamynyń modernızasııasy úrdisindegi tulǵanyń áleýmettenýiniń úlgileri» taqyrybynda doktorlyq dıssertasııasyn tabysty qorǵap, áleýmettaný ǵylymynyń doktory ǵylymı dárejesine ıe bolǵan.
Gúlnapıs Orynbasarqyzynyń áleýmettanýdyń ózekti máselelerine qatysty 40-tan asa oqý quraly men monografııasy, 80-ge jýyq ǵylymı jáne ádistemelik maqalasy jaryqqa shyqqan. Professor óz eńbekterinde tulǵany áleýmettanýlyq turǵydan zerttegen áleýmettaný ǵylymynyń klassıkteri men qazirgi ǵalymdardyń eńbekterine súıene otyryp, tulǵa áleýmettanýynyń damýyna ólsheýsiz úles qosty.
Ǵalym kásibı jáne qoǵamdyq qyzmetindegi qajyrly eńbeginiń arqasynda joǵary marapattarǵa ıe boldy. «Qazaqstan Respýblıkasy bilim berý salasynyń qurmetti qyzmetkeri» tósbelgisimen marapattaldy. Bilim salasyna sińirgen eńbeginiń jemisi retinde 2011 jyly «Joǵary oqý ornynyń úzdik oqytýshysy» baıqaýynyń jeńimpazy atandy. 2022 jyly «Úzdik ǵylymı qyzmetker» ataǵyna ıe boldy.
«Taý alystaǵan saıyn bıikteı berip, tulǵalana túsedi» demekshi, ǵalymnyń ǵylymǵa, onyń ishinde áleýmettaný salasyna sińirgen eńbegi tarıhta qalary sózsiz. Gýlnapıs Orynbasarqyzy ómirden ótkenimen, kisilik kemel bolmysy, bıik adamgershiligi men aq peıili talaı adamnyń jadynda saqtalyp qalǵany anyq. Aldyńyz – peıish, artyńyz – kenish, jatqan jerińiz jánnattyń tóri bolsyn. Jarqyn beıneńiz sizdi biletin árbir jannyń júreginde árdaıym saqtalady.
Eske alýshy:
Ásem OMAROVA,
Ál-Farabı atyndaǵy Qazaq ulttyq ýnıversıteti áleýmettaný jáne áleýmettik jumys kafedrasynyń oqytýshysy
