«SEVKAZENERGO» AQ baspasóz qyzmetiniń málimetinshe, Petropavlda jylytý maýsymy 1 qazannan bastaldy. Kásiporyn jańa jylý berý maýsymyna joǵary jaýapkershilikpen qarap otyr. Jóndeý úderisteriniń mańyzdy kezeńderi, sonyń ishinde №3 pen №11 qazandyqtaryndaǵy kúrdeli jumystar óz mejesine jetti. Búginde №1 men №10 qazandyq agregattary jóndelip bitti. Qazirgi tańda №1 týrboagregatty tolyq kúrdeli jóndeýden ótkizý kútip tur. Biraq ol kondensasııalyq tıptegi týrbına bolǵandyqtan, ony jóndeý jylytý merzimine áser etpeıdi. Qalǵan týrboagregattardyń jóndeý jumystary aıaqtaldy. 8 qazandyq pen 5 týrboagregaty bar PTES-2 jumysyn qarqyndy atqaryp jatyr. Eske sala ketsek, Petropavlda jylý berý maýsymy resmı túrde bastalmaı turyp-aq bilim berý men medısınalyq mekemelerdi jylý júıesine qosý qolǵa alynǵan edi. Búginde qalanyń 118 áleýmettik nysany, 31 densaýlyq saqtaý mekemesi, 258 kópqabatty baspana men 233 jeke turǵyn úıge jylý berildi. Sondaı-aq qosalqy 77 ǵımarat jylytý júıesine qosyldy. Jospar boıynsha aldaǵy 7 kúnniń ishinde barlyq nysan jylýmen qamtylýy qajet.
Oblys ortalyǵynda jylytý maýsymy bastaldy. Qysy qatty bolatyn Pavlodar qalasy úshin jylý máselesi árqashan mańyzdy. Sol sebepti de «PAVLODARENERGO» AQ-da jylý jáne elektrmen jabdyqtaý nysandaryndaǵy jóndeý-qalpyna keltirý jumystary aldaǵy qysqa daıyndyqtyń quramdas bóligi sanalady. Stansa jumysynyń barysyn baqylap otyrǵan dırektor Igor Grınev JEO-3-tiń qalany jylýmen qamtýǵa daıyn ekenin jetkizdi. Daıyndyq barysynda №2, 3 týrboagregatqa, №2, 4, 6 qazandyqqa kúrdeli jóndeý júrgizilgen. JEO-2-de de №1 qazandyq pen №2 týrboagregattaryna kúrdeli jóndeý jumystarynan ótken. Al №3 qazandyqta júrgizilip jatqan jóndeý jumystary qazannyń sońyna deıin aıaqtalady. Pavlodarda 2023-2024 jyldarǵa arnalǵan jylý berý maýsymy 18 qyrkúıekte bastalyp, birinshi kezekte áleýmettik nysandar men memlekettik mekemeler jylýǵa qosyldy. Qazirgi tańda kópqabatty úılerge jylý berilip jatyr.
Ekibastuz jylý elektr ortalyǵynda da jylý berý maýsymy bastalyp ketti. Jylytý maýsymy bastalar aldynda jylýmen jabdyqtaý mamandary kúrdeli jóndeý men qaıta jańartýdan keıin stansa jabdyqtary men jylý jelilerine mindetti synaqtar júrgizdi. Abaı kóshesindegi qaıta jańartylǵan magıstraldardyń synaqtary sátti ótti, onyń barysynda birde-bir zaqym anyqtalǵan joq. Sondaı-aq Máshhúr Júsip kóshesindegi magıstraldyq qubyrǵa synaqtar júrgizildi. Bıyl Ekibastuzda jylý jelileriniń 70 shaqyrymnan asa magıstraldyq jáne oramishilik qubyrlary jóndeldi. Qazirgi ýaqytta Ekibastuz JEO-da 4 qazandyq agregaty daıyn. Onyń ekeýi iske qosyldy. Bas dırektor Anatolıı Moıseı daıyn qazandyq agregattary jylytý maýsymynan bastap qalany jetkilikti jylýmen qamtamasyz etetinin málimdedi. Ekibastuz JEO-nyń jóndeý jumystaryna 585 adam tartylsa, onyń 499-y – merdiger uıymdardyń qyzmetkerleri. Barlyq shara ýaqytyly jáne qalany úzdiksiz jylýmen qamtamasyz etý maqsatynda júrgizilip jatyr.
«AESK» AQ jylytý maýsymynyń jumys barysyn baqylap, onyń joǵary jaýapkershilikpen jasalyp jatqanyn habarlady. Bas dırektor Aleksandr Pavlovtyń aıtýynsha, jylý berý maýsymyna daıyndyq qashanda sapaly deńgeıde júrgiziledi. Daıyndyq sapasy 85%-dan tómen emes. Al qosalqy stansalardy kúrdeli jóndeý jumystary 93%-ǵa oryndalǵan.
«OAEK» AQ-taǵy jylý jáne elektr jelileri boıynsha júrip jatqan jumystar qys mezgilinde turǵyndardy energııa resýrstarymen qamtamasyz etýge baǵyttalǵan. Kompanııanyń qazirgi maqsaty – barlyq jumysty dál ýaqytynda aıaqtap, árbir úıge jylýdy der kezinde jetkizý.
OAEK baspasóz qyzmeti
