7 qazanda Izraıldegi áskerı-saıası jaǵdaıdyń shıelenisýine baılanysty mınıstrlikte jedel shtab qurylyp, sheteldegi tótenshe jaǵdaılar kezindegi is-qımyl algorıtmin dereý oryndaýǵa kirisken.
Syrtqy ister mınıstrliginde jáne Qazaqstannyń Tel-Avıvtegi Elshiliginde Izraıl aýmaǵyndaǵy QR azamattary men olardyń elimizdegi týystary úshin shuǵyl baılanys jelisi ashyldy.
Eki kún ishinde otandastarymyzdyń 500-den astam qońyraýlary men suraýlaryna jaýap berilgen. Búgingi tańda Qazaqstannyń Izraıldegi elshiliktiń konsýldyq esebine 77 azamat tirkelgen (Elshilik qyzmetkerleri men olardyń otbasy múshelerin qosa alǵanda). Izraıldiń joǵary oqý oryndarynda Qazaqstannan 5 stýdent oqıdy, sondaı-aq 30-ǵa jýyq otandastarymyz jergilikti túrli medısınalyq mekemelerinde taǵylymdamadan ótip (barlyǵy 112 adam) jatyr.
Tel-Avıvtegi dıplomattarymyz Izraıldegi Qazaqstan azamattarymen turaqty baılanysta jáne olarmen ózara jedel is-qımyl jasaý maqsatynda messendjerde arnaıy chat qurdy. Qazirgi ýaqytta oǵan Izraılde ýaqytsha jáne turaqty turatyn 200-ge jýyq Qazaqstan azamaty qosylǵan. Atalǵan chatta otandastarymyz ózderiniń ornalasqan jeri týraly habarlap, dıplomattarmen tikeleı baılanys ornatty, al dıplomattar óz kezeginde azamattarymyzǵa ártúrli máseleler boıynsha keńes berip, tıisti konsýldyq-quqyqtyq kómek kórsetip jatyr. Izraıldegi barlyq Qazaqstan azamattary sabyrlyq saqtap, dıplomattarǵa qajetti aqparatty usynýǵa barynsha járdemdesip jatyr jáne jergilikti bılik organdarynyń barlyq talaptary men qaýipsizdik sharalaryn qatań saqtap otyr.
Aıta ketsek, Izraılde qaza bolǵan, zardap shekken jáne kepilge alynǵan Qazaqstan azamattary týraly aqparat kelip túspegen.
Keıbir avıareısterdiń toqtatylýyna jáne birqatar avıatasymaldaýshylardyń Izraılge reısterdi oryndaýdan bas tartýyna baılanysty Qazaqstan Elshiligi «Eır Astana» áýekompanııasymen birlesip, Qazaqstanǵa oralýǵa nıet bildirgen azamattardyń tizimin qalyptastyrý, sondaı-aq olardy odan ári qaýipsiz jerge shyǵarýdy uıymdastyrý boıynsha pysyqtaý jumystaryn júrgizip jatyr. Osy ýaqytqa deıin Qazaqstanǵa oralýǵa 118 azamatymyz nıet bildirgen. Tel-Avıvtegi Ben-Gýrıon atyndaǵy Halyqaralyq áýejaı óz jumysyn shtattyq rejımde jalǵastyryp jatyr.
Osy rette, bir-eki kún ishinde Úkimet deńgeıinde Tel-Avıvke jiberiletin arnaıy repatrıasııalyq reısti uıymdastyrý máselesi de kún tártibine alyndy.
Qazaqstannyń Tel-Avıvtegi Elshiliginiń boljamy boıynsha Izraılde konsýldyq esepke turmaǵan 400-den astam Qazaqstan azamaty bolýy múmkin.
