«Kókózek» qosalqy stansasynyń qurylysy «Alataý Jaryq Kompanııasy» AQ, «Samuryq-Energo» AQ elektr energetıkalyq holdınginiń qurylymyndaǵy kompanııanyń qarajaty esebinen júzege asyrylǵan. Jobanyń quny – 2,73 mlrd teńge.
Bul joba Qarasaı aýdanynda bos qýat tapshylyǵy bar ındýstrııalyq aımaqty elektr energııasymen qamtamasyz etedi. Sonymen qatar jańa qosalqy stansa shaǵyn jáne orta bıznes sýbektilerin senimdi ári turaqty túre elektrmen jabdyqtaýǵa múmkindik beredi degen senim mol.
Almatymen irgeles jatqan Qarasaı aýdanynda 110/10 kV «Kókózek» qosalqy stansasyn salý qajettiligi birqatar faktordan týyndaǵan. Atalǵan óńirde qosymsha qýattardy berýdiń shekteýli múmkindigi máselesi óńirdiń ónerkásiptik áleýetiniń damýyn tejeýmen qatar, óńirdegi qosalqy stansalardyń joǵary, maksımaldy júktemesi elektr jabdyqtarynyń jıi apatty isten shyǵýyna jáne tutynýshylardy, sonyń ishinde bilim berý jáne densaýlyq saqtaý nysandaryn elektr qýatymen jabdyqtaýdaǵy úzilisterge alyp keldi. Qosymsha stansanyń iske qosylýy atalǵan problemalardyń túıinin tarqatatyn bolady.
Nysannyń ashylý saltanatyna Almaty oblysynyń ákimi Marat Sultanǵazıev, «Samuryq-Qazyna» AQ Strategııa jáne aktıvterdi basqarý jónindegi basqarýshy dırektory Ernat Berdiǵulov, «Samuryq-Energo» AQ basqarma tóraǵasy Qaırat Maqsutov jáne «Samuryq-Energo» AQ О́ndiris jáne aktıvterdi basqarý jónindegi basqarýshy dırektory Rýslan Turǵambaev, «Alataý Jaryq Kompanııasy» AQ basqarma tóraǵasy Abaı Asylov qatysyp, Memleket basshysynyń tapsyrmasyna sáıkes ındýstrıaldyq aımaqty elektr energııasymen jetkilikti mólsherde qamtamasyz etý jobalary munymen shektelmeı, jalǵasyn tabatyndyǵyn tilge tıek etti.
«Qarasaı aýdanynda ornalasqan kóptegen kásiporynnyń oblysymyzdyń ekonomıkalyq damýyna qosatyn úlesi mol. Qosymsha qýattardyń berilmeýi – aýdannyń ónerkásiptik áleýetiniń damýyn tejep keldi. Munda jańa jobalardy iske asyrý, sondaı-aq jumys istep turǵan kásiporyndardy jańǵyrtý, olardyń óndiristik qýatyn arttyrý múmkindigi shektelgen bolatyn. «Kókózek» qosalqy stansasyn salý arqyly atalǵan máselelerdi sheship otyrmyz.
Árqaısysy 63 megavoltamper bolatyn 2 transformatory bar jańa qosalqy stansany paıdalanýǵa berý transformatorlyq qýattyń jetispeýshiligi problemasyn joıyp qana qoımaı, shaǵyn jáne orta bıznes sýbektilerin turaqty elektr qýatymen jabdyqtaýdy qamtamasyz etedi. Sonymen qatar bul aımaqta áleýmettik-mádenı mańyzy bar obektilerdi salý múmkindigin keńeıtip, jańa jumys oryndarynyń ashylýyna yqpal etetin bolady. Osy ıgilikti isti atqarǵan árbir azamatqa jáne nysan qurylysyn merziminde aıaqtaǵan «Asia Group Energy» JShS-na alǵysymdy bildiremin», dedi óńir basshysy Marat Sultanǵazıev.
Sondaı-aq oblys ákimi «Kókózek» qosalqy stansasy Qarasaı aýdany úshin ǵana emes, kórshiles Ile, Jambyl aýdanynyń sharýashylyqtary úshin tıimdi bolyp otyrǵandyǵyn, keleshekte olardy da elektr qýatymen jetkilikti mólsherde qamtamasyz etetindigin atap aıtty. Almaty aınalma jolynyń ashylýy óńirde ınvestısııalyq jobalardyń tartymdylyǵyna oń áserin tıgizip keledi. Osy sebepti, qosalqy stansanyń mańyzdylyǵy oblystyń áleýmettik-ekonomıkalyq áleýeti úshin orasan zor ekendigin jetkizdi.
Almaty oblysynda búgingi kúni elektr energııasyna degen suranys eselep artýda. Oǵan Qonaev qalasynyń ósýi men «Gate City» qalashyǵynyń boı kóterýi, sondaı-aq «Shelek», «Jetigen», «Qazbek bek», «Qaırat» syndy 4 iri ındýstrıaldyq aımaqtardyń qurylýy sebep.
«Mysalǵa aıtsaq, byltyrǵy jyly 200 gektar jerge ornalasqan «Qaırat» ındýstrıaldyq aımaǵyn ashtyq. Onyń ishinde búgingi kúnge birde-bir oryn qalmady. Kózdelgen 11 zaýyt salynyp, alǵashqylary az kúnde jumysyn bastaıdy. Osy mańaıda myń gektardy alyp jatqan «Qazbek bek» ındýstrıaldyq aımaǵyna búgingi kúnge elektr qýattylyǵy jetispeıdi. Ony qamtamasyz etý úshin ınvestorlar tartý kózdeldi», degen Marat Eleýsizuly ınfraqurylym jaqsarar bolsa, óńirde óndiris salasy qarqyndy damıtyndyǵyn alǵa tartty.
«Samuryq-Energo» AQ basqarma tóraǵasy Qaırat Maqsutovtyń aıtýynsha, jańa qosalqy stansanyń qurylysy 2021 jyly bastalyp, jumys júrgizý kestesine sáıkes júzege asyrylǵan. Endi óńir úshin óte mańyzdy energetıkalyq nysan 346 shaǵyn jáne orta bıznes sýbektilerin, sondaı-aq aýdandaǵy turǵyn úı sektorynyń 1 362 tutynýshylaryn senimdi ári turaqty túrde elektrmen jabdyqtaýdy qamtamasyz etedi.
«Qosalqy stansa qosymsha tutynýshylardy qosý yqtımaldyǵyn qamtamasyz etýge múmkindik beredi, osylaısha, óndiris pen bıznesti damytý úshin ǵana emes, turǵyndar úshin qajetti áleýmettik nysandardy salý úshin de qolaıly jaǵdaı jasaıdy. Mysaly, búginde Kókózek jáne Eltaı aýyldarynda 1 500 baladan turatyn eki jaıly mektepti qosýǵa tehnıkalyq jaǵdaı jasaldy», dep atap ótti «Samuryq-Energo» AQ basshysy.
Kompanııa sarapshylarynyń sózinshe, Almaty energojúıesin damytý belgilengen qarqynmen júrip jatyr. Investısııalyq baǵdarlamaǵa sáıkes qoldanystaǵy elektr jelilerin jaǵyrtý jáne jańa elektr jelilerin salý, sondaı-aq eskirgen jabdyqtardy aýystyra otyryp, qolda bar transformatorlyq qosalqy stansalardy rekonstrýksııalaý jónindegi jumystar júzege asyrylady. Osy jobalardy iske asyrý jelilerdiń ótkizý qabiletin arttyrýǵa, elektr energııasyn berý kezindegi tehnıkalyq shyǵyndardy azaıtýǵa, jańa tutynýshylardyń qosylýyn qamtamasy etýge jáne jelidegi kerneý sapasyn arttyrýǵa múmkindik beredi.
Almaty oblysy
