Foto: primeminister.kz
Úkimet basshysy Álıhan Smaıylov damyǵan elderde kadr daıarlaý júıesine, onyń ishinde kásiptik tehnıkalyq bilim berý sapasyn arttyrýǵa basymdyq beriletinin aıtty. Álemdik tájirıbe boıynsha jastar qoǵamǵa sińip, maman atanýy úshin memleket qashanda qamqorlyqty aıamaıdy.
«Elimizde 9-synyp túlekterine kolledjderde tegin oqýǵa múmkindik berilgen. 3 jyl ishinde kadr daıarlaýǵa tıisti memlekettik tapsyrys kólemi ulǵaıtyldy. Eger buǵan deıin kolledjderde bıýdjet esebinen 95 myń stýdent oqysa, bıyl olardyń sany 133 myńǵa deıin ulǵaıtyldy. Biz memlekettik tapsyrysty budan ári de arttyra beremiz», dedi Úkimet basshysy.
Bıyldan bastap kolledj stýdentteriniń shákirtaqysy 50%-ǵa ósti. Osy baǵytpen 2025 jylǵa deıin stıpendııalar taǵy 2 esege ósiriledi. Úkimet basshysy Oqý-aǵartý mınıstrligine múddeli memlekettik organdarmen, ákimdiktermen jáne «Atameken» palatasymen birlesip, Tehnıkalyq jáne kásiptik bilim berýdi jańǵyrtý jónindegi jol kartasyn ázirleýdi júktedi.
