Sonymen qatar Prezıdentke «Batys Eýropa – Batys Qytaı» halyqaralyq dáliziniń Qyzylorda qalasynan Aqtóbe oblysynyń shekarasyna deıingi aralyǵyn (566 km) I sanattaǵy 4 jolaqty jolǵa aýystyrý josparlanyp otyrǵany týraly málimet berildi.
Osy rette atalǵan baǵyttaǵy jumystardyń jobalyq-smetalyq qujattamalaryn ázirleý kelesi jyldan bastalady.
Memleket basshysy qazirgi jol, shyn máninde, óte tar ekenin atap ótip, ony keńeıtý jumystaryn tezirek bastaý qajettigine nazar aýdardy. Bul rette Prezıdent Premer-mınıstrdiń birinshi orynbasary Roman Sklıarǵa máseleni baqylaýǵa alý jóninde tapsyrma berdi.
Sonymen qatar Prezıdentke Qyzylorda qalasynyń jańa jylý elektr ortalyǵynyń jobasy tanystyryldy.
Byltyr Energetıka mınıstrligi túrkııalyq «Aksa Enerji Uretim AS» kompanııasymen Qyzylorda qalasynda jańa bý - gaz qondyrǵysyn ornatý jóninde kelisimshartqa qol qoıdy. Sheteldik ınvestısııa esebinen salynyp jatqan jańa JEO 240MVt elektr qýatyn jáne saǵatyna 277 jylý qýatyn óndire alady. Jobanyń boljamdy quny – 215 mıllıard teńge.
Oblys ákiminiń aıtýynsha, qazir qurylysqa daıyndyq jumystary qyzý júrip jatyr. 2025 jyldyń sońyna deıin paıdalanýǵa beriletin JEO qalanyń jylý jáne elektr qajettiligin tolyq qamtamasyz etip qana qoımaı, artylǵan elektr energııasyn basqa óńirlerge satýǵa múmkindik beredi.
Qazirgi qoldanystaǵy jylý elektr ortalyǵy 1964 jyly salynǵan. Birneshe ret kúrdeli jóndeý júrgizilse de, strategııalyq nysannyń negizgi jáne qosalqy qondyrǵylarynyń tozý deńgeıi 90 paıyzǵa jetken. Sondaı-aq qaladaǵy uzyndyǵy 207,7 shaqyrym bolatyn jylý jelisiniń jartysyna jýyǵy jańartýdy qajet etedi.
Memleket basshysy elimizdiń energetıkalyq qaýipsizdigin kúsheıtý turǵysynan bul jobanyń mańyzdy ekenin atap ótip, Úkimet pen oblys ákimdigine jylý elektr ortalyǵyn belgilengen merzimde paıdalanýǵa berýdi tapsyrdy.
Buǵan qosa, Prezıdentke Qyzylorda oblysy ákiminiń orynbasary, Qazaqstan Respýblıkasy Prezıdentiniń «Baıqońyr» keshenindegi arnaýly ókili Qaırat Nurtaı kosmodrom qalashyǵyndaǵy ahýal týraly baıandady. Qasym-Jomart Toqaev qalany áleýmettik-ekonomıkalyq turǵydan damytý úshin Reseı tarapymen tyǵyz qarym-qatynasta jumys isteý qajet ekenine nazar aýdardy.
