Sýretti túsirgen Erlan OMAR, «EQ»
О́zekti máseleni májilis spıkeri Erlan Qoshanov qozǵady. Ol jaýapty memlekettik organdar áli naqty sheshim qabyldamaǵanyn eske saldy.
«Bul máseleni Memleket basshysy da kóterip, tapsyrma bergen edi. Depýtattar da jan-jaqty talqylap, oılaryn ortaǵa saldy, biraq áli naqty sheshim joq. Sondyqtan naqty sheshim qabyldaıtyn ýaqyt keldi. Biz birtutas ustanymǵa kelýimiz kerek. О́ıtkeni ol bizdiń balalarymyzdyń jáne bolashaq urpaqtyń densaýlyǵyna qaýip tóndiredi», dedi Erlan Qoshanov.
Depýtat Dáýlet Turlyhanov elektrondy temeki men veıpter kámeletke tolmaǵandarǵa erkin satylyp jatqanyn mysalǵa keltirip, dabyl qaqty.
«Prezıdent Atyraýǵa jumys saparymen barǵan kezde bul dertpen kúresý kerek ekenin, jaman ádettiń taralýyna jol bermeý kerek ekenin dál aıtty. Qazir stýdentter de veıpke táýeldi bolyp ketken. Olardy satyp alý óte ońaı, jastar kóshede de emin-erkin shegip júre beredi. Bul másele tek Qazaqstanda ǵana emes búkil álemde de ózekti bolyp otyr. 2018 jyly mektep oqýshylarynyń minez-qulqyn zertteý barysynda balalardyń 14%-y jáne uldardyń 6%-y veıp shegetini anyqtaldy. Mundaı zııandy zattardyń qorabynda 20 jasqa tolmaǵan adamdarǵa satýǵa bolmaıdy dep jazylǵan. Statıstıkaǵa nazar aýdarsaq, sońǵy jarty jylda veıpti satý 32%-ǵa ósti», dedi Dáýlet Turlyhanov.
Osy tusta Densaýlyq saqtaý mınıstri Ajar Ǵınııat qazir zańnamaǵa tıisti túzetýler engizý qarastyrylyp jatqanyn aıtty.
«Qazaqstanda veıpterge tyıym salý máselesi boıynsha zań jobalaryna standarttar engizilip jatyr. Olar Úkimet otyrysynda qaraldy. Densaýlyq saqtaý salasy da bul standarttardy qoldaıdy. Qazir tıisti quzyrly organdar veıpterdi paıdalanýǵa tolyq tyıym salý máselesin qarastyryp jatyr», dep túsindirdi Ajar Ǵınııat.
