Foto: ashyq derekkóz
Prezıdent mundaı qadam elimizdi tehnologııalyq turǵyda damytýdyń ornyqty baǵytyn aıqyndaýǵa múmkindik beretinin, bul – halyqaralyq ozyq tájirıbe ekenin atap ótti.
«Eń aldymen, jasandy ıntellekt tehnologııasyn ekonomıkamyzdyń munaı-gaz sektory, energetıka, aýyl sharýashylyǵy, kólik jáne logıstıka sekildi mańyzdy salalaryna engizýge mán berýimiz qajet dep sanaımyn», dedi Memleket basshysy.
Jasandy ıntellekt qalalarymyzdy ómir súrýge jáne jumys isteýge qolaıly ári tolyqqandy aqyldy qalaǵa (smart city) aınaldyrý prosesin aıtarlyqtaı dárejede ońtaılandyra alatynyn aıtqan Qasym-Jomart Toqaev: «Memlekettik qyzmet kórsetý kezinde jasandy ıntellekt múmkindikterin keńinen paıdalanýdyń da mańyzy zor. Bul oraıda biz eleýli nátıjege qol jetkizdik», dedi.
Sonymen qosa Prezıdent azamattardyń áleýmettik ál-aýqatynyń deńgeıin anyqtaýǵa jáne olarǵa proaktıvti memlekettik qoldaý kórsetýge múmkindik beretin «Otbasynyń sıfrlyq kartasy» iske qosylǵanyn aıtty.
«Mundaı ónimdi «Báıterek» holdıngi bazasynda bıznes úshin de engizý kerek. Meniń tapsyrmam boıynsha bul baǵytta aýqymdy sıfrlyq transformasııalaý jumystary bastalyp ketti», dedi ol.
