Foto: ashyq derekkóz
«Jasandy ıntellektini qoldanysqa engizý adamdarǵa arnalǵan jumys oryndarynyń jappaı joıylýyna alyp kelmeıdi. Kerisinshe, adam eńbegi transformasııaǵa ushyrap, múldem jańa kásibı daǵdylarǵa suranys paıda bolady. Sondyqtan qyzmetkerlerdi jańa daǵdylarǵa mektepten bastap baýlý qajet. Osyǵan oraı, eń aldymen, sıfrlyq saýattylyq pen ınformatıkany oqytý sapasyn arttyrǵan jón. Ol úshin bilikti ustaz tapshylyǵyn sheshý qajet», deı kele Prezıdent «Astana Hub» halyqaralyq tehnoparkinde bilim berý platformasy tabysty jumys istep jatqanyn aıtty.
Onyń aıtýynsha, atalǵan platforma arqyly joǵary oqý ornynyń stýdentteri baǵdarlama jasaýdy úırenedi. Úkimet barlyq máseleni pysyqtap, mektep oqýshylary úshin osyndaı onlaın platformany pılottyq rejımde iske qosýy múmkin.
«Ýnıversıtetterde pánderdi oqytýdyń mazmuny men ádisin aıtarlyqtaı jańartý qajet. Bolashaq muǵalimder, dárigerler, agronomdar, zańgerler jáne salalyq mamandar jasandy ıntellekt boıynsha bazalyq bilimdi mindetti túrde meńgerýi kerek. Men jýyrdaǵy Joldaýymda keminde úsh belgili joǵary oqý orny jasandy ıntellekt baǵytyna qajetti kadr daıarlaýmen jáne zertteýler júrgizýmen aınalysýy kerek degen mindet júktedim. Nazarbaev Ýnıversıteti janyndaǵy Aqyldy júıeler jáne jasandy ıntellekt ınstıtýtyn tolyqqandy ǵylymı-zertteý ınstıtýtyna aınaldyrý taǵy bir mańyzdy qadam bolmaq. Ol úzdik mamandar men sarapshylardyń ortalyǵyna aınalyp, birtutas ekojúıe qalyptastyrýy kerek. Instıtýt quramyna IT ındýstrııasynyń álemdik jáne otandyq kóshbasshylarymen tyǵyz baılanysta jumys isteıtin ǵylymı-zertteý jáne tájirıbelik-konstrýktorlyq jumystar ortalyǵy kiredi. Osy rette Instıtýt ázirlemelerin kommersııalandyrý jáne keńeıtý mańyzdy», dedi Q.Toqaev.
