Jıyndy M.Áýezov atyndaǵy Ádebıet jáne óner ınstıtýtynyń bas dırektory, fılologııa ǵylymdarynyń doktory, UǴA korrespondent múshesi Kenjehan Matyjanov ashyp, Maǵjan murasyn zertteýdiń mańyzy jaıynda aıtyp ótti.
Alqaly jıynnyń mańyzdy bólimi M.Áýezov atyndaǵy Ádebıet jáne óner ınstıtýty ǵalymdary jaryqqa shyǵarǵan «Maǵjan Jumabaevtyń akademııalyq jınaǵyn tanystyrýǵa arnaldy. Akademııalyq basylym serııasymen jaryqqa shyqqan úsh tomǵa Maǵjan Jumabaevtyń óleńderi, poemalary men aýdarmalary, oqýlyqtar men oqý quraldary, ǵylymı maqalalary enip otyr.
Maǵjan murasy týǵan eliniń bostandyǵy men erkindigi, túrki áleminiń tutastyǵy men birligine arnaldy. Sondyqtan Maǵjan Jumabaev shyǵarmalarynyń túrki rýhanııatyndaǵy mańyzyn ashý búgingi ýaqyt talaby, dep atap ótti osy jıynda Halyqaralyq túrki akademııasynyń vıse-prezıdenti, PhD Ashat Kesikbaev.
Jıynda Myrza Ulyqbek atyndaǵy О́zbekstan Ulttyq ýnıversıtetiniń professory, fılologııa ǵylymdarynyń doktory Nasımhon Rahmonov «Maǵjan Jumabaev - ulttyq oıaný ádebıetiniń basty ókili» taqyrybyna baıandama jasasa, ál-Farabı atyndaǵy Qazaq ulttyq ýnıversıtetiniń professory, fılologııa ǵylymdarynyń doktory Dandaı Ysqaquly «Maǵjan - túrki áleminiń dara aqyny» ekenin óz baıandamasyna arqaý etti. Al tarıh ǵylymdarynyń doktory, professor, UǴA akademıgi Mámbet Qoıgeldi «Alash partııasy jáne Maǵjan» týrasynda oı órbitse, Evrazııa ǵylymı-zertteý ınstıtýtynyń dırektory, PhD, professor Sýat Beılýr «Túrki áleminiń ıntegrasııasyndaǵy Maǵjannyń orny», Qazaqstan Jazýshylar odaǵy tóraǵasynyń orynbasary, fılologııa ǵylymdarynyń doktory, professor Baýyrjan Jaqyp «Maǵjan poezııasynyń keıbir erekshelikteri» taqyrybyndaǵy baıandamasymen alashshyl aqynnyń murasynyń mańyzyn ashyp qana qoımaı, ony búgingi kún turǵysynan zertteý máselesin qozǵady.
Jıynda sonymen birge kınorejısser, dokýmentalıst H.Omarov túsirgen «Maǵjan Jumabaev» derekti fılmi kórsetildi.
Konferensııaǵa qatysqan ǵalymdar Maǵjannyń aqyndyq álemi, HH-HHI ǵasyrdaǵy ádebı-mádenı baılanystar, Maǵjantaný jáne túrkologııa salasy, kórkem ádebıettegi Maǵjannyń aqyndyq dástúri, aǵartýshylyq qyzmeti, qaıratkerlik tulǵasy jáne Alash qozǵalysy, qazirgi zamanǵy ózekti máseleleri, arhıv, mýzeı jáne sırek qoljazba derekterindegi Maǵjan murasyn zertteýge baılanysty pikirlerin ortaǵa saldy.
ALMATY
