Saılaýshylar senimi aqtaldy ma?

Sodan beri eki aıǵa jýyqtaǵan ýaqyt aralyǵynda ákim ózine júktelgen mindetti jete sezinip, saılaýaldy baǵdarlamasyn júzege asyrýǵa bilek sybana kirisip ketken. Nurjan Maratuly búginde 8,5 myń hal­qy bar Qarakemer aýyldyq okrýginiń áleýmettik-ekonomıkalyq damýyna, tur­mys-tirshiliginiń jaqsarýyna jastyq jigeri men bilim-biligin jumyldyryp jatyr.

«Týǵan aýylymnyń gúldenip, áleý­mettik ahýalynyń jaqsarýyna atsaly­sý­dy azamattyq paryzym dep bilemin. Prezıdentimiz Qasym-Jomart Toqaev jastarǵa zor senim artyp otyr. Soǵan laıyq jumys isteýge tıispiz. «Kelisip pishken ton – kelte bolmas» degendeı, aýyldyń jaı-japsaryn, kem-ketigin qalpyna keltirýde kópti kórgen aqsa­qal­darmen, eńbek ardagerlerimen, kásipkerlermen keńesip, birlese ju­mystar jasaýdamyz. Irgesi ertede qalanyp, tarıhy tasqa basylǵan aýy­lymyzda atqa­ry­lar jumys az emes. Aýyldyń ákimi atanǵaly bergi bir jarym aı ishinde Qarakemerde jarylǵan káriz júıesin qaıta qalpyna keltirip, iske qostyq. Bir shaqyrymdyq elektr jelileri men baǵandary aýystyryldy. Taldybulaq pen Sataı aýyldaryna jaryqtandyrý jumystary júrgizildi. Qyrkúıek aıynan aýylymyzdyń rýhanı oshaǵy – Mádenıet úıine aǵymdaǵy jóndeý jumystary bas­taldy. Sondaı-aq Qarttar kúnine oraı 30 otbasyna áleýmettik kómek kórsetildi. Aýy­lymyzda ekiqabatty 15 úı bar. So­lardy aldaǵy jyldary ortalyq­tan­dy­rylǵan jylytý júıesine qosý úshin blokty-modýldik qazandyq ornatýǵa jo­balyq-smetalyq qujatqa bıýdjettik ótinim berildi», – degen Nurjan Aqanov aldaǵy josparlaryn da jipke tizgendeı etip jetkizdi.

Alǵashqy eńbek jolyn aýdandyq «Halyqqa qyzmet etý ortalyǵynda» maman bolyp bastaǵan ol, keıin bólim ınspektory, bas maman, 2019 jyly aýdandyq «Halyqty jumyspen qamtý ortalyǵy» dırektorynyń orynbasary qyzmetine taǵaıyndalǵan. Osy­laı­sha, halyqpen jumys isteýdiń qyr-syryna qanyqqan N.Aqanov aýyldyq okrýgtiń ınfraqurylymyn jaqsartý maqsatynda aldaǵy jylǵa kóshelerdi jaryqtandyrýǵa, asfalttaýǵa, 90 pa­ıyz tozyǵy jetken aýyzsý júıelerin jańartýǵa bıýdjettik ótinim berýdi jos­parlap otyr. Aýyldy kógil­dir otynmen qamtamasyz etý – basty mindet.

Okrýg ortalyǵy Qarakemerde Ulttyq ulannyń 6654 áskerı bólimi bar. Ondaǵy áskerı qyzmetshilerdiń 80 paıyzǵa jýyǵy – aýyl turǵyndary. Sonymen qatar aýyl ekonomıkasynyń damýyna «Tóre Jaılaý» sharýa qojalyǵy men álemge tanymal «Arba Wine» sharap zaýytynyń shapaǵaty tııýde. Buǵan qosa, okrýgte 30-ǵa jýyq jeke kásipker men shaǵyn jáne orta bıznes keń qanat jaıyp, tynys-tirshiligin túrlendirýde.

Qarakemer aýylynda salynǵanyna 60 jyldan asqan poshta torabynyń búgingi kórinisi kóńil kónshitpeıdi. Tur­ǵyndardyń poshta ǵımaratyn jańadan salýdy surap júrgenderine birneshe jyldyń júzi bolǵan. Aýyldyq poshta men ýchaskelik pýnkt jekemenshik ǵı­ma­rat­tyń 2 bólmesin jalǵa alyp otyrǵan jaıy bar. Jańa ákim jaýyr bolǵan osy máselelerdiń túbegeıli sheshim tabýyna ózi muryndyq bolmaq. Búginde jer ýchaskesi bólinip, keler jyly ýchaskelik pýnktiń qurylysy bastalady degen senimde.

Al aýyldyq okrýgtiń Sataı aýy­lynda jańa qurylys boı kóterip, qo­nys­tanýshylar qatary jyldan jyl­ǵa kóbeıip keledi. Bul aýyldyń 350-ge jýyq oqýshysy birneshe jyl boıy Qara­ke­merdegi Qudaıbergen Orym­betov atyn­da­ǵy orta mektepke tasymal­da­nyp oqy­ty­lady. О́zekti másele eskerýsiz qal­maı, «Jaıly mektep» baǵ­dar­la­ma­sy boıynsha 900 oryndyq mek­tep­tiń qurylysy bastalypty. Aýyl tur­ǵyn­dary úshin asa mańyzdy nysan qu­rylysy 2024 jyl­dyń jeltoqsan aıynda aıaqtalady dep josparlanǵan.

Okrýgke qarasty Taldybulaq aýy­lyn­­daǵy feldsherlik akýsherlik pýnkt ma­mandary da turǵyn úıdi jalǵa alyp, jalpaq jurtqa medısınalyq qyz­met kórsetip otyr. Talbulaqtyqtardyń taǵy bir problemasy – sýmen jabdyqtaý júıe­si­niń 80 paıyzynyń tozyǵy jetken. 1986 jyly salynǵan sý qubyrynyń jalpy uzyndyǵy 13 shaqyrymdy quraıdy. Sý qubyryn jóndeý úshin ótinim berilgen. Budan ózge qysqy otyn-sý qamy, qańǵybas ıtterdi aýlaý, kúzgi sanıtarlyq tazalyq jumystary da ákim nazarynda.

Aýyl halqynyń áleýetin arttyrý jolyndaǵy tolǵaýy toqsan máseleler­diń túıinin tarqatýdy dittegen Nurjan Maratulynyń aldaǵy atqarar sharýasy­nyń az emestigi aıqyn. Sondaı-aq ol, aýyl turǵyndarynyń memlekettik baǵ­dar­la­ma­lar boıynsha kásip ashyp, sha­ǵyn jáne orta bıznesti damytýǵa den qoıý qajettigin qu­laqtandyrýdy umyt qaldyrmaıdy. Sebebi jyl sońynda joǵaryda atalǵan áskerı bólim «kóshedi» degendi estigen jurt «jumyssyz qalamyz ba?» dep alań­daýly.

Dese de, eńbekpen nan taýyp, yryzǵy-nesibesin molaıtyp otyrǵan aýylda mádenıettiń oty mazdap, jastardy rýhanı baıytý jolyndaǵy jumystar jandana túsken. Aýyldyq Mádenıet úıinde «Qarakemer» balalar teatry, «Úki» bı ansambli, «Qarakemer» vokaldy ansambli turaqty jumys istese, onyń qatary bıyl Toqtasyn Áblezov atyndaǵy jyr-terme ortalyǵymen tolyqqan. Aýyl ákimi mádenıet pen rýhanııattyń jala­ýyn kóterip júrgen óner janashyrlaryna qoldaý bildirip, órisin keńeıtýge jiti kóńil bóletindigin tilge tıek etti.

Mal men júzim sharýashylyǵyn da­mytýdyń ozyq úlgisine aınalǵan Qara­kemer aýyly Keńes Odaǵynyń Batyr­lary Raqymjan Toqataev, Qashaǵan Ja­manǵaraevtyń esimderimen tyǵyz baı­lanysty. Qos batyrdyń músini qatar qoıylyp, ortasyndaǵy eskertkish taqtaǵa Ekinshi dúnıejúzilik soǵysqa qatysqan maıdangerler tizimi jazylǵan eken. Sol tizimde tórtinshi turǵan Amanbaıuly Ybyraıym atasynyń jolyn qýyp, halyqqa qaltqysyz qyzmet etýge Nurjan Aqanov ta ýáde etken.

Almaty oblysy