Qaraǵandy oblysynyń mádenıet, arhıvter jáne qujattama basqarmasy uıymdastyrǵan festıvalge QR Parlamentiniń depýtattary, mádenıet Komıtetiniń ókilderi, Qaraǵandy oblysy ákimdiginiń apparaty, Qaraǵandy oblysy basqarmalarynyń basshylary, QR mýzeıleriniń basshylary men mamandary, E.Bóketov atyndaǵy QarMUÝ ǵalymdary, kórnekti qoǵam qaıratkerleri, BAQ ókilderi qatysty.
Taldy tarıhı-arheologııalyq parkiniń tarıhı-arheologııalyq eskertkishteriniń biregeıligin álemdik jáne otandyq qoǵamdastyqqa kórsetý, búkil Qazaqstannyń tarıhı-mádenı murasyn tanymal etýde suranysqa ıe týrıstik ónim retinde damýyna yqpal etý festıvaldiń basty maqsattarynyń biri boldy.
Festıval aıasynda qola balqytý, qysh qumyra jasaý, ulttyq kıim túrlerin tigý sııaqty túrli baǵyttar boıynsha sheberlik sabaqtary ótti.
Festıval baǵdarlamasyna sáıkes oblystyń shyǵarmashylyq ujymdarynyń qatysýymen teatrlandyrylǵan qoıylym men konserttik baǵdarlama jáne sadaq atýdan jarys uıymdastyryldy. Umyt bolǵan qazaqtyń ulttyq taǵamdary usynylǵan kórme, sondaı-aq qazaqtyń tazylary men jyrtqysh qustardyń kórmesi ótti.
Festıvalge qatysýshylar men qonaqtar úshin Taldy parkinde ornalasqan arheologııalyq eskertkishter boıynsha ekskýrsııalar uıymdastyryldy. Is-shara sońynda lazerlik shoý kórsetildi.
