Saılaý júıesin túbirimen ózgertpese, ádildikke esh kepildik joq. Eń aldymen, daýys sanaýǵa sıfrlyq múmkindikterdi engizý kerek. Elimizdegi sıfrlyq damý úderisin sheteldikterdiń ózderi joǵary baǵalap, tańdanysyn bildirgenine talaı ret kýá boldyq. Endeshe, nege sol jetistikti saılaý kezinde daýysty ádil sanaýǵa paıdalanbasqa?
Senat saılaýy kezinde úmitkerdiń aldyn ala jergilikti máslıhat depýtattarynyń belgili bir bóliginiń kelisimin alatyn talabyn da joıǵan durys dep sanaımyn. О́ıtkeni jergilikti bılik ózderi «jaqtyrmaıtyn» azamattar ótip ketpeýi úshin, birneshe «unamdy» adamdardan jalǵan úmitkerler jasap, olarǵa aldyn ala máslıhat depýtattarynyń kelisimin jınastyryp qoıady. Sóıtip, jergilikti bılikke «tıimsizder» úmitker bola almaı qalady. Tirkeý aıaqtalǵannan keıin álgi qoldan jasalǵan úmitkerler kandıdatýralaryn «óz erikterimen» alyp tastaıdy.
Qandaı deńgeıdegi saılaý bolsa da tirkeýden ótken úmitkerler saılaýdyń orta tusyna kelgende «artqa qadam» jasaýyna jol bermeý kerek. О́ıtkeni ádette mundaı «qadamǵa baratyndar» jalǵan úmitkerler bolyp keletini belgili.
Aýyl ákimderiniń saılaýynda turǵyndar kimniń saılanatynyn kúni buryn bilip otyrady. О́ıtkeni joǵarydan nusqaý berý áli de tyıylmaı tur. Bıylǵy Májilis saılaýynda da burmalaýshylyq týraly qansha aıtyldy, naqty aıǵaqtar da keltirildi. Biraq jazalanǵan kim bar? Eshkim. Munyń bári aınalyp kelgende halyqtyń bılikke degen senimin azaıtady.
Memleket basshysynyń ádiletti Qazaqstan qurý maqsatynda saıası reformalardy qolǵa alǵany qýantady. Alaıda orta joldaǵylar bul úderiske kópe-kórineý kedergi jasaıdy. Soǵan jol beretin qıturqy ádisterdi zańmen shektep, saılaýdyń ádil ótýine barynsha kúsh salynbasa, halyqtyń senimin eshqashan aqtaı almaımyz. Elimizde túbegeıli ózgeris bolý úshin eń aldymen, «Saılaý týraly» zańdy túbegeıli ózgertý qajet.
Bekzat DAIRABAIULY,
Ulytaý oblystyq máslıhatynyń depýtaty
