Foto: Erlan Omarov
– Esim hanym, ózińizdi tereńirek tanystyrsańyz, Fransııada ómirge keldińiz ǵoı.
– Bizdiń ata-babalarymyz 1920 jyldardaǵy úrkin kezinde bas saýǵalap Gımalaı asyp, Aýǵanstan, Iran arqyly Túrkııadan turaq tapqan eken. Keıin ákelerimiz Fransııaǵa qonys aýdarǵan. Qytaıdaǵy qazaqtarǵa qorǵan, tireý bolǵan Zýqa batyr meniń tikeleı naǵashy babam. Anam sol kisiniń urpaǵy. Ákem teri óndirý isimen shuǵyldanady, anam meıramhanada qyzmet atqarady. Úıde úsh aǵaıyndymyz. О́zim 17 jasymnan bastap saıasat salasyna aralasyp qyzmet atqaryp kelemin.
Foto: parlam.kz
– Kreı qalasynda qansha qazaq bar?
– Kreı qalasynda qazaqtar joq, Parıj qalasynda qazaq dıasporasy bar. Biz jıi bas qosyp, túrli merekelik jıyndarda jınalyp turamyz. Bizdiń túp tamyrymyz Qazaqstanmen tikeleı baılanysty ekenin eshqashan umytpaımyz. Sondyqtan da Parıj qalasyndaǵy qazaq dıasporasyndaǵy qandastarymyzben jıi-bıi bas qosyp, túrli meıram uıymdastyryp, qazaqtyń ulttyq taǵamdaryn ázirlep jınalamyz. Sporttyq, mádenı sharalar jıi uıymdastyrylady. Eýropa qurlyǵyndaǵy qazaq dısporalary da únemi bas qosamyz. Mundaǵy maqsat ózimizdiń qazaqy bolmysymyzdan ajyrap qalmaýdyń qamy. Meniń ákem Fransııaǵa 1980 jyly Túrkııadan kóship barǵan eken, anamyz 1990 jyly qonys aýdarypty Túrkııadan osy elge. Men Fransııada ómirge keldim, oqýdy osy elde aıaqtadym. Fransýz, túrik, aǵylshyn tilderinde erkin sóıleımin. О́kinishke qaraı, qazaq tilin bizdiń býyn jete bilmeıdi. Qazaqstanmen tyǵyz baılanys ornatyp, barys-kelisti jıiletý ana tilimizdi úırenýge septigi tıedi dep oılaımyn. Mysaly jýyrda Astana qalasynda ótken «Otandastar - 2023» forýmyna qatysý úshin Qazaqstanǵa alǵash ret keldim. О́te erekshe áser aldym. Keleshekte de jıi kelip turamyn. Qazaqstan degende meniń kóz aldyma baıtaq dala, alyp taýlar, óristi dúbirge bólegen jylqylar elesteıtin. Astana qalasyna kelgenimde erekshe tolqydym. Táýelsizdigin jarııalaǵanyna 30 jyldan endi asqan jas memlekettiń keleshegi kemel dep oılaımyn. Bolashaqtyń tutqasy – bilimdi urpaq. Sondyqtan da til úırenip, órkenıettiń kóshinen qalmaý úshin bilim alý mańyzdy der edim. Atamekenimiz Qazaqstan keleshekte kórkeıe túsedi dep senemin.
– Astanadaǵy forým aıasynda delegasııa músheleri Parlament Májilisinde depýtattarmen kezdesti. Osy jıynda ózińiz de boldyńyz.
– Iá, men de Kreı qalasy basshysynyń mádenıet salasyna jaýapty orynbasary laýazymyna taǵaıyndalǵanǵa deıin depýtattyq mandatty atqarǵanmyn. Qazaqstandaǵy depýtattarmen júzdesip, jumys barysymen tanystyq. Kitaphanada depýttarmen kezdesý de áserli boldy. Fransııada qala ákimderin jergilikti turǵyndar daýys berý arqyly saılaıdy. Ákim óziniń orynbasaryn ózi taǵaıyndaıdy. Ár sala boıynsha jeke orynbasarlary bar. Meni mádenıet salasy boıynsha orynbasarlyqqa bekitti. Bizdiń atqaratyn jumysymyz memlekettik qyzmet sanalmaıdy, saıası laýazym dep atalady.
