Keıde jol qurylysyna jaýaptylar jol salýdy qarjyǵa qol salý dep túsinetindeı kórinetini belgili. Sapaly jol salý jumystary Memleket basshysynyń da nazarynan tys qalǵan joq. Prezıdent Qasym-Jomart Toqaev «Ádiletti Qazaqstannyń ekonomıkalyq baǵdary» atty Qazaqstan halqyna arnaǵan Joldaýynda jol salý jumysyna qadaǵalaýdy kúsheıtýdi shegelep tapsyrdy. Tipti Prezıdent eldegi joldardyń jaıy jurttyń júıkesin shymyrlatatynyn da qadap aıtty. Shynynda da, jol qurylysyndaǵy jumystardy júıeleýdiń mańyzy zor.
«Avtokólik joldarynyń qurylysyna qatysty máseleler sheshimin tabýǵa tıis. Qazir onyń sapasy syn kótermeıdi. Tıisti jumystar ýaqtyly jáne sapaly jasalmaıdy. Jemqorlyq beleń alyp tur, báseke de joqtyń qasy. Munyń bári – osy salada tamyr jaıǵan kemshilikter. Sondyqtan jyl sońyna deıin naqty sharalar qabyldaý qajet. Mindetin adal atqarmaǵan kompanııalar zań boıynsha jaýapqa tartylady. Bul máselege basa nazar aýdaramyn. Baqylaýdy kúsheıtip, jańa normatıvtik qujattar qabyldaý kerek», degen Prezıdent sóziniń jany bar.
Memleketimizde jol salý, qaıta qurý, jóndeý jáne kútip ustaý, sondaı-aq jol aktıvterin basqarý salasyndaǵy jumystar men materıaldardyń sapasyn saralaý isteri «Jol aktıvteri ulttyq sapa ortalyǵynyń» negizgi mindeti retinde belgilengen.
Kásiporynnyń óńirlik fılıaly jyl ishinde az jumys atqarmaǵany anyq. Sapa jáne esep bóliminiń ınjeneri Toıshybaı Álıahmetov keltirgen derekke júginsek, «Jol aktıvteri ulttyq sapa ortalyǵynyń» Jambyl oblystyq fılıaly az ýaqyt ishinde 211 nysanǵa arnaıy at basyn buryp, 431 ret issaparmen barǵan eken. Nátıjesinde, jol qurylysyna qajetti materıaldardan 1253 dana úlgi alynǵan. Álbette, az emes, biraq sapa jaǵy máz emes bolyp tur. Nege deısiz ǵoı? Synaqtan ótkizilgen 123 dana materıaldyń talapqa saı kelmeıtini naqtylanypty. Bul másele kimdi de bolsyn oılandyrsa kerek-ti.
«Mamandar anyqtaǵan kemshilikter boıynsha tapsyrys berýshi tarap pen merdiger uıymdarǵa tıisti hattar joldandy. Merdiger kompanııalar jaýapkershilik júgin sezinip, jumystyń sapaly atqarylýyna den qoısa degen tilek kókeıde atoılap tur. Ásirese asfalt-beton jabyndysyn ornatý tehnologııasyna aıryqsha nazar aýdarsa deımiz. Sapasyz salynǵan jol talaı oqıǵanyń sebebine aınalýy yqtımal ekenin esten shyǵarmaǵan abzal. О́kinishke qaraı, búginde el ishindegi tas joldardyń sapasy syn kótermeı tur. Bul máselege Memleket basshysy da aıryqsha den qoıǵany barshamyzǵa málim. Aldaǵy ýaqytta merdigerlerdiń jumysyna baqylaýdy kúsheıtý kerek sekildi. Sonda ǵana tıisti jumystar laıyqty deńgeıde atqarylmaq», deıdi T. Álıahmetov máseleniń mánisine úńilip.
Basqany bylaı qoıǵanda, jol salý jumystaryna mıllıardtaǵan qarajat qarastyrylatyny anyq. Qyrýar qarjy jumsalsa da, jol máselesi áli kúnge deıin sheshimin tappaı turǵany aqıqat. Aqyly jolǵa aqsha tólep júrgen aqyldy kólik júrgizýshileriniń de aıtary az emes. Halyqtan túsken salyq esebinen salynǵan joldyń sapaly bolǵanyn qalaıdy olar. Alaıda salada qalyptasqan olqylyq tyıylar emes. Bul máseleni kim, qalaı sheshedi? Álde jabýly qazan jabýly kúıinde qala bere me?
«Jol aktıvteri ulttyq sapa ortalyǵy» óńirlik fılıalynyń qyzmetkerleri bıylǵy jyldyń 9 aıynda 309 nysanǵa 559 ret issaparmen arnaıy barǵan. Jumys úderisinde jol-qurylys materıaldarynyń 1736 danasynan úlgi alynyp, onyń 266-sy normatıvtik talaptarǵa saı kelmeıtinin anyqtaǵan. Júrgizilgen jumystardyń nátıjesinde tıisti taraptarǵa 121 hat joldapty. Mamandardyń aıtýynsha, jumys úderisi barysynda asfalt-beton jamylǵysyn tıisti deńgeıde tyǵyzdamaý máselesi kózge uryp tur eken.
О́ńirlik fılıaldaǵy mamandar ómirlik máseleni alǵa tartyp otyrǵany túsinikti. Qysqasy, osy qurylysqa jaýapty barlyq tarap jol salýdy qarjyǵa qol salýmen shatastyrmaýy kerek. Sonda ǵana Prezıdent tapsyrmasy tolyqtaı oryndalmaq.
Jambyl oblysy
