Sýretterdi túsirgen – Erlan OMAR, «EQ»
Bul merekelik data kitaphanalardyń jumysyn jandandyryp, sala mamandarynyń bedelin arttyrý maqsatynda bekitilgen edi. Atalǵan merekege oraı el astanasynda alqaly jıyn ótip, elimizdiń túkpir-túkpirinen kelgen kitaphanashylar bas qosty. Mádenıet jáne aqparat mınıstri Aıda Balaeva arnaıy qatysqan saltanatty is-shara aıasynda kitaphanashylarǵa «Mádenıet salasynyń úzdigi» tósbelgisi tapsyrylyp, Qurmet gramotasy jáne Alǵyshattarmen marapattaldy.
«Ádiletti Qazaqstan – Adal azamat» ulttyq quryltaıynyń ekinshi otyrysynda Memleket basshysy: «Shyn máninde, kitap oqıtyn el ǵana aqyldy ultqa aınalady. Biz jas urpaqtyń kitapqa degen qushtarlyǵyn oıatýymyz kerek», dep atap ótti. Qasym-Jomart Kemeluly sizderge úlken úmit artyp, jas urpaqty ulttyq qundylyqtar negizinde tárbıelep otyrǵan kitaphanalar men kitaphanashylardyń jaǵdaıyna erekshe nazar aýdarady. Buǵan kásibı mereke – ótken jyly Qazaqstanda Úkimettiń qaýlysymen bekitilgen – Kitaphanashylar kúni dálel bola alady. Elimizde 11 myńǵa jýyq kitaphana jumys isteıdi, olardyń shtatynda 25 myńnan astam adam bar, kitap qory 328 mıllıon danadan asty. Kitaphana qyzmetterin paıdalanýshylar sany 9,5 mıllıonǵa jetti jáne bul kórsetkish jyl saıyn artyp keledi. Árıne, barlyq jetistikke kitaphanashylardyń kásibı eńbegi men aǵartýshylyq róliniń arqasynda jettik», dedi Aıda Balaeva.
Merekelik jıynǵa qatysýshylar óńirlerdegi kitaphanalyq qyzmet kórsetýdegi ozyq jobalarmen tanysyp, kitaphana tarıhyna arnalǵan arnaıy kórmeni tamashalady. Sondaı-aq atalǵan salany damytýǵa baılanysty ózekti máseleler talqylandy. Mádenıet jáne aqparat mınıstri Aıda Balaevanyń tóraǵalyǵymen ótken dóńgelek ústel jumysyna ǵalymdar, aqyn-jazýshylar, baspagerler, kitaphana mamandary qatysty.
Is-sharany Mádenıet jáne aqparat mınıstri Aıda Balaeva ashyp, kitaphanalar men oqyrmandardyń yntymaqtastyǵyna, birligine qatysty oıyn jetkizdi.
«Memleket basshysy «jas urpaqtyń kitapqa degen qushtarlyǵyn oıatý» naqty mindetin qoıdy. Prezıdent óziniń aldyńǵy sózderinde de kitaphana salasyn damytýǵa erekshe nazar aýdardy. Osyǵan baılanysty biz Prezıdenttiń barlyq tapsyrmasyn oryndaý boıynsha qajetti sharalardy qabyldap jatyrmyz», dedi mınıstr.
Sondaı-aq dóńgelek ústel barysynda osy baǵyttaǵy jumys nátıjeleri týraly baıandaldy. Atap aıtsaq, mınıstr kitaphanashylardyń jalaqysyn 2025 jylǵa qaraı 100%-ǵa arttyrý maqsatynda kitaphana qyzmetkerleriniń jalaqysyn jyl saıyn 25%-ǵa ulǵaıtý jónindegi josparymen bólisti. Kitap qoryn jańartý boıynsha da birqatar shara qabyldanyp jatyr. Keıingi 5 jylda memlekettik tapsyryspen 4,5 mıllıon kitap shyǵarylǵan.
Mınıstr sheteldik bestsellerdi qazaq tiline aýdarý – mańyzdy aspekt ekenin de alǵa tartty. Sonymen qatar oqyrmannyń suranysyna saı kitaptar shyǵarý úshin kitap oqýshylar arasynda arnaıy áleýmettik saýalnamalar júrgizý josparlanyp otyr. Ulttyq elektrondyq kitaphanany damytý jumystary da belsendi júrgizilip jatyr.
«Qazaqstannyń elektrondyq kitaphanasy» jobasy aıasynda oqyrman «biryńǵaı bılet» arqyly elimizdiń kez kelgen kitaphanasynyń elektrondyq bazasyna qol jetkize alatyndaı barlyq kitaphanany biryńǵaı aqparattyq júıege qosý josparlanyp otyrǵany da aıtyldy.
Budan bólek, dóńgelek ústelge qatysýshylar salany damytýǵa qatysty óz pikirlerimen bólisti. Qorytyndy sózinde mınıstr is-shara barysynda aıtylǵan barlyq usynys eskerilip, taldanyp, jumysqa qabyldanatynyn atap ótti.
Aıta keteıik, búginde elimizde 11 myńǵa jýyq kitaphana jumys isteıdi. Onyń 7 myńnan astamy bilim júıesine qarasty bolsa, 3 myńnan astamy mádenıet salasyna baǵynady.
