Qaıyrymdylyq – otandastarymyzdyń birligin bekemdep, yntymaǵyn arttyratyn ıgi is. Jyl basynan beri Assambleıa osy ulttyq qundylyqty dáriptep, 250 myńnan asa adamǵa kómek qolyn sozdy. Jaqsylyqtyń jarshysyna aınalǵan jandar jalpy kólemi 2 mlrd teńgege jýyq qarjy jumsaǵan.
– Elimizdiń egemendigi týraly Deklarasııa qabyldanǵan bul aıtýly data – eldiń tuǵyry berik memleket qurý jolyndaǵy tarıhı qadamnyń nyshany retinde aıryqsha mańyzǵa ıe mereke. Bul kún birtutas halqymyzdyń birligin arttyrýǵa, memlekettigimizdi nyǵaıtýǵa baǵyttalǵan is-sharalar ótkizýmen erekshelenedi. Osyndaı is-sharalardyń biri ári biregeıi – «Qaıyrymdylyq kerýeni» aksııasy. Forýmda qaıyrymdylyq jasaýshylardyń izgi nıeti men jomarttyǵyna qurmet kórsetemiz. О́ıtkeni Assambleıa el basyna kún týǵan shaqta kóppen birge súringenge – súıeý, qınalǵanǵa demeý bola bildi. Ár myń sanynyń artynda naqty bir adam, otbasy tur. Máselen, «Mektepke jol» aksııasy aıasynda ǵana balalarǵa 153 mln teńge kóleminde kómek kórsettik. Abaı oblysyndaǵy órtten zardap shekkenderge de 47 mln teńge kóleminde kómek berildi. Biz kómekke muqtaj árbir jan memleket pen qoǵamnyń qoldaýyn sezinetindeı qoǵam quryp jatyrmyz. Ádiletti Qazaqstan eń aldymen, ınklıýzıvti memleketten bastaý alady. «Qaıyrymdylyq kerýeni» jobasy aıasynda biz qoǵamnyń nazaryn balalardyń óneri men shyǵarmashylyǵyna aýdaramyz. Osy oraıda, 40-tan asa qulaǵy estimeıtin jáne nashar estıtin balalardan quralǵan Soltústik Qazaqstan oblysynyń «Sensitive» bı ansamblin erekshe atap ótkim keledi, – dedi Assambleıa tóraǵasynyń orynbasary Marat Ázilhanov.
Forýmda jyl qorytyndysy boıynsha qaıyrymdylyq salasyna úles qosqan jáne erekshe qajettilikteri bar daryndy balalarǵa qoldaý kórsetken azamattar Assambleıa atynan «Jomart jan» tósbelgisimen marapattaldy. Jan-jaqtan jınalǵan kórermenge shyǵarmashylyq nómirler usynyldy. Sondaı-aq alańda mamandardyń ınklıýzıvti jáne arnaıy bilim berýdegi ınnovasııalyq ádistemeleriniń tájirıbelik keısteri tanystyryldy. Ym-ıshara tilin qoldaný, kórý qabileti buzylǵan balalardy oqytý jáne tárbıeleý, ata-analarǵa, pedagogterge jáne ÚEU-ǵa ádistemelik kómek kórsetý máseleleri qaraldy.
– Depýtattyq korpýs ınklıýzıvti balalar máselelerine qatysty arnaıy dóńgelek ústel ótkizdi. Jıynda bilim berý, psıhologterdiń deńgeıi, kásibı sarapshylar arasynda qandaı suraqtar kóteriledi jáne arnaıy ortalyqtarda sarapshylar qandaı bolýy kerek syndy taqyryptar kóterildi. Qatysýshylar arasynda QHA músheleri, Oqý-aǵartý mınıstrligi ókilderi, Májilis depýtattary da bar. О́ıtkeni QHA bıyl elimizdegi partııalarmen memorandýmǵa qol qoıdy. Sonyń negizinde partııa atynan depýtattyq mandat alǵan azamattarmen túrli qoǵamdyq máseleni birlese talqylaımyz, – Mádenıet jáne aqparat mınıstrligi janyndaǵy «Qoǵamdyq kelisim» RMM dırektory Elına Masagýtova.
