Premer-lıga oıyndarynyń 25-týrynda Shymkenttiń «Ordabasy» komandasy óz alańynda Qaraǵandynyń «Shahterin» qabyldap, qarsylastarynan 3:1 esebimen basym tústi. Mańyzdy úsh upaıyna qol jetkizgen «Ordabasy» chempıonattyń aıaqtalýyna bir týr qalǵanda týrnır kestesinde ekinshi orynda kele jatqan elordanyń «Astanasynan» baqandaı alty upaıǵa ozyp, óz tarıhynda tuńǵysh ret el chempıony atandy!
Qajymuqan atyndaǵy Ortalyq stadıonda ótken kezdesýdiń alǵashqy mınýttarynan bastap alań ıeleri oıyn tizginin óz qolyna alyp, birinshi taımnyń nebári 30-mınýtyna deıin match taǵdyryn sheship tastady. Kezdesýdiń tórtinshi mınýtynda Aıbar Jaqsylyqov oıynnyń esebin ashsa, arada segiz mınýt ótkende «Ordabasynyń» ózbekstandyq shabýylshysy Shahboz Ýmarov esepti eseledi – 2:0. Al 27-mınýtta ýkraınalyq Artem Besedın «Ordabasynyń» úshinshi golyn soǵyp, komandasyna jeńis syılady. Ekinshi taımda qaraǵandylyqtardyń jalǵyz jubanysh golyn Temýr Chogadze soqty.
Osylaısha, el birinshiliginde alǵash ret top jarǵan «Ordabasy» klýby endi kelesi jylǵy ÝEFA Chempıondar lıgasynyń irikteý kezeńinde óner kórsetedi.
